E Samschdeg waren d'Sam Tanson an den Dan Kersch eis Invitéen an der Emissioun Background am Gespréich um Radio.

Background am Gespréich vum 14. Oktober

Fir den éischte Background no de Wale waren zwee Politiker am Studio, fir déi de leschte Sonndeg kee ganz gudden Dag war. D'Partei vun der Spëtzekandidatin Sam Tanson ass de grousse Walverléierer. Déi Gréng hunn d'Fraktiounsstäerkt verluer. D'LSAP gouf zwar gestäerkt, mä den Dan Kersch gouf net an d'Chamber gewielt.

Et war en enorme Schock, seet d'Spëtzekandidatin Sam Tanson eng knapp Woch no der Waldefaite vun de Gréngen. Nieft der Situatioun vun den Deputéierte géing virun allem d'Schicksal vun de Mataarbechter an der Fraktioun an an der Partei si staark bedrécken. Et wier mat just véier Deputéiert net méiglech, alleguer d'Leit ze halen, sou d'Nach-Justiz- a Kulturministesch e Samschdeg de Mëtteg am RTL-Background.

Perséinlech géing et hir net schlecht goen. Si hätt elo d'Perspektiv, fir méi Zäit fir hir Famill ze hunn an aneren Interessien nozegoen.

D'Sich no der Ursaach wier amgaangen. Ënner anerem sollen Ëmfroe bei de Membere gemaach ginn. Et sollt ee sech net eleng op extern Facteure fokusséieren, wéi de sougenannte Grénge-Bashing. Natierlech hätt een als Gréng Feeler gemaach, seet d'Sam Tanson a verweist notamment op den Dossier Gaardenhaischen.

Si wéilt d'Mandat am Parlament unhuelen. Si ass interesséiert, Cheffin vum parlamentaresche Grupp vun de Gréngen ze ginn, sollten hir Kolleege si dobäi ënnerstëtzen.

Eng éischt Analys hätt erginn, datt en technesche Grupp mat Déi Lénk keng Avantagen hätt.

Mat der CSV a mam Luc Frieden wier et e ganz respektvolle Walkampf ginn. Mat Bléck op déi schwaarz-blo Politik freet d'Sam Tanson sech, ob d'Steierversprieche kënnen agehale ginn. Aner Dossieren, déi si enk wäert suivéieren, sinn eventuell Sécherheetsmesuren, d'Fro vun der Gerechtegkeet, de Logement an den Natur- a Klimaschutz.

Wéi d'Sam Tanson huet och den zweeten Invité vun der Emissioun, den Dan Kersch, keen Zweiwel drun, datt CSV an DP sech eens ginn.

Hie geet dervunner aus, datt et eng verkappte Steierreform fir Privatleit wäert ginn a parallel Entlaaschtunge vu Betriber. Den Dan Kersch geet och dovunner aus, datt et mat engem Premier Luc Frieden nees e Retour vun Austeritéitspolitik wäert kommen.

Hien hofft, datt sech eng staark Oppositioun forméiert, och zesumme mat deene Gréngen.
D'LSAP misst elo keng Kompromësser méi maachen a kéint elo zum Beispill méi offensiv op de Klimaschutz an op d'Steiergerechtegkeet setzen.

De laangjäregen LSAP-Minister an dono Deputéierten Dan Kersch gouf net erëm gewielt. Als Minister zerécktrieden an an d'Chamber goen, dat géing den Dan Kersch nach emol sou maachen, seet hien. Natierlech hätt hie sech domat selwer vum Radar geholl. Leider géing de Fokus staark op der Exekutiv leien hei am Land. Hien hätt gären nach bëssen an der Chamber matgemëscht, mä hie wier lo op kee Fall um Buedem zerstéiert, sou wéi Verschiddener dat géingen hoffen. Den Dan Kersch versprécht, datt hien och an Zukunft "net de Bak géing halen".

Fir den Dan Kersch sinn iwwregens och d'Sondagen ee vun de grousse Walverléierer.

Background am Gespréich vum 14. Oktober

"Background am Gespréich" leeft ëmmer samschdes an der Mëttesstonn (vun 12 bis 13 Auer) op RTL Radio Lëtzebuerg an am Livestream um Internet respektiv an der App (Audio a Video). Dono ass d'Emissioun op RTL.LU an um RTL Play zu all Ament nach eemol ze lauschteren oder ze kucken - an der Rubrik "Radio" bei Emissiounen "Background" wielen.