E Samschdeg waren den David Weis, den Henri Grün an de Frank Wies eis Invitéen an der Emissioun Background am Gespréich um Radio.

De 7. Oktober markéiert den Ufank vun engem weideren Déifpunkt am Konflikt am Noen Osten. Op deem Dag huet d‘Hamas, eng Organisatioun déi ënnert anerem vun der EU als Terrorgrupp gelëscht ass, Israel iwwerfall. Bis zu 1.500 Persoune goufen op israeeleschen Territoire vun der Hamas brutal ermort, iwwer 4.000 goufe blesséiert a knapps 200 gekidnappt.

Background am Gespréich vum 21. Oktober 2023

Wéi gëtt déi nei Eskalatioun am Noen Osten hei zu Lëtzebuerg suivéiert?

An der jiddescher Communautéit wär de Schock immens grouss, esou den David Weis. Verschidde Leit géifen bei dësen Attacken u grujeleg Evenementer géint Judden aus der Geschicht denken. De President vum Comité pour une Paix Juste au Proche-Orient huet der jiddescher Communautéit Matleed fir déi vill Doudeg ausgeschwat.

Den Henri Grün huet betount, et wéilt een net matmaachen bei der Polariséierung vun dësem Konflikt. Mënschlech Affer wären ni gutt.

D‘israeelesch Regierung wiert sech mat massive militäreschen Operatiounen an der Gazasträif.  Am Artikel 51 an der UN-Charta steet d‘Recht sech ze verdeedegen, erkläert de Mënscherechtsexpert an Affekot Frank Wies. Israel hätt deemno e Recht op Selbstverdeedegung, ma senger Meenung no ass d‘Fro vum "Wéi" immens wichteg. De Frank Wies huet sech dem US-President Biden ugeschloss, deen Israel gewarnt hat, et wär immens wichteg, elo net eleng aus der Emotioun eraus ze reagéieren.

Den Henri Grün huet d‘Proportionalitéit vun der israeelescher Revanche a Fro gestallt.  An der Gazasträif sinn och schonn dausenden onschëlleg Zivilisten ëm d‘Liewe komm. Déi eenzeg Solutioun a sengen Aen sinn Negociatiounen.

Den David Weis betount, dass Judden net gläich den israeelesche Staat sinn, och wann si natierlech e Lien mat deem Land hunn. Progressiv Judden wéi hien, wäre beaflosst vun de Mënscherechter an et wär ee fir alles wat zu Fridde féiert. Ob een awer elo mat enger Hamas kann negociéieren, dat kéint hien net aschätzen.
D‘israeelesch Gesellschaft wär gespléckt, wat d‘Saach net méi einfach géif maachen. D‘Attacke vun der Hamas hätten d‘Leit awer erëm méi no beienee bruecht, observéiert den David Weis. En änleche Phänomen géif een elo och ënnert de Palestinenser gesinn, esou den Henri Grün.

D‘Hëllefen, déi um Samschdeg finalement iwwer déi ägyptesch Grenz an d‘Gazasträif geliwwert goufen, wiere just eng Drëps op de waarme Steen, bedauert de Frank Wies.
De Risiko, dass humanitär Hëllefen an d‘Hänn vun der Hamas falen, misst een agoen, fënnt den Henri Grün. Et kéim ee wuel och net derlaanscht, mat der Hamas ze negociéieren, fir dëse Konflikt op en Enn ze bréngen an d‘Geisele fräi ze kréien.

Den David Weis huet allerdéngs och virdru gewarnt, d‘Dote vun der Hamas, ze relativiséieren.

Wéi vill vun deem Krich ass nach reliéis motivéiert?

Dem Henri Grün no wier et kloer en territoriale Konflikt. Reliéis Extremisten géifen deen vun zwou Säiten instrumentaliséieren, huet och den David Weis erkläert.

De CPJPO fuerdert, dass d‘westlech Welt sech staark mécht fir eng Zwee-Staate-Léisung, wou Israeelien an d‘Palestinenser a getrennte Staate gläichberechtegt liewe kënnen. Dat wär awer duerch déi vill israeelesch Siidler an de Palestinensergebidder schwéier. Fir eng Léisung mat engem Staat, bréicht et eng grouss Ouverture vu Säite vun den israeeleschen Autoritéiten. Och déi Chance schätzt den Henri Grün also kleng an. Nawell missten d'Verhandlungen nees ufänken.

Och an Israel géif et e ganz groussen Debat iwwer d‘Zukunft ginn, erkläert den David Weis. Wat hien als europäesche Judd net wéilt, wär dass den Haass aus dem Noen Osten heihin importéiert gëtt. Hie bedauert, dass eng wirtschaftlech Zesummenaarbecht an doduerch politesch Kooperatioun, wéi se an Europa nom 2. Weltkrich entaméiert gouf, an Israel awer dacks net géif bei de Leit resonnéieren.

D‘Angscht bei der jiddescher Communautéit wier den Ament immens grouss. Menacen a Beleidegunge géife Judden och zu Lëtzebuerg erliewen.

Am Verglach mam europäeschen Ausland, wou vill un der Sécherheet vun de Gebaier an der Presenz vun der Police geschafft gouf , wier zu Lëtzebuerg net vill geschitt, beklot den David Weis. D‘Relatioune mat der Police wiere gutt, ma et wier ee ronderëm d’Feierdeeg nach ëmmer op privat Sécherheetsdéngschter ugewisen. Do géif et Nohuelbedarf ginn an et géif een e Manktem u Versteesdemech, déi Gefor Eescht ze huelen, constatéieren.
Den Henri Grün huet confirméiert, dass de CPJPO op de pro-palestinensesche Manifestatiounen, déi e mat-organiséiert, dofir suergt, dass keng antisemittesch Parolle geäussert respektiv Zeeche gewise ginn.

De Frank Wies huet awer och virdru gewarnt, elo all d‘arabesch Migranten an een Dëppen ze geheien. Wann et an der muslimescher Communautéit antisemittesch Tendenze géif, da kéint een déi am beschten duerch eng gelongen Integratioun eliminéieren.

De Resumé vum Background am Video:

"Background am Gespréich" leeft ëmmer samschdes an der Mëttesstonn (vun 12 bis 13 Auer) op RTL Radio Lëtzebuerg an am Livestream um Internet respektiv an der App (Audio a Video). Dono ass d'Emissioun op RTL.LU an um RTL Play zu all Ament nach eemol ze lauschteren oder ze kucken - an der Rubrik "Radio" bei Emissiounen "Background" wielen.