Dräi vun de jonke Gesiichter um Krautmaart hunn e Samschdeg de Mëtteg am RTL-Background éischt politesch Prioritéite formuléiert.

D’Liz Braz, de Luc Emering an de Ben Polidori gehéieren zu den Iwwerraschunge vum Walsonndeg. Déi 27 Joer al Süddeputéiert Liz Braz (LSAP), de Luc Emering (DP) an den 33 Joer ale Ben Polidori (Piraten) hunn am RTL-Background éischt politesch Prioritéite formuléiert. An den éischten 100 Deeg misst déi nei Regierung mat enger Steierreform kommen, fuerdere Braz a Polidori. Fir de Luc Emering musse fir d'alleréischt Prozeduren erliichtert ginn am Naturschutz an am Logement.

Background am Gespréich: Liz Braz, Luc Emmering, Ben Polidori

Als Jonker an der Politik fille sech déi dräi Deputéiert gréisstendeels ënnerstëtzt an hire Parteien.

"D'Politik do ass ëmmer bësse jidderee géint jiddereen, ech hunn awer d'Gefill gehat trotzdeem och, wéi ech gesot hunn, dass ech awer bereet wär, mat an d'Walen ze goen, dass dat generell breet matgedroe gouf an ech hunn och natierlech ëmmer Leit, un déi een sech méi ka wenden, wéi un anerer, dat hunn ech och sou materlieft, mee generell hunn ech awer lo kee weidere Problem gesinn."

An och nom Walsonndeg, si keng Picke komm? "Keng riicht an d'Gesiicht, nee", seet d'Liz Braz vun der LSAP.

De Resumé vum Background am Gespréich vum 4. November
Dräi vun de jonke Gesiichter um Krautmaart hunn e Samschdeg de Mëtteg am RTL-Background éischt politesch Prioritéite formuléiert.

Klimakris

E gréissert Thema an der Emissioun waren de Klimawandel an d'Energie-Transitioun. De generelle Constat war deen, datt weider Efforten néideg sinn, datt awer politesch Feeler gemaach goufen.

D'Leit misste wuel waakreg ginn a Gewunnechten änneren. Allerdéngs wier de Wee, deen d'Politik déi lescht 10 Joer wollt goen, net bei de Leit ukomm, esou d'LSAP-Deputéiert.

Et dierft een net d'Gefill vermëttelen, de Leit alles wëllen ze verbidden. Dat wier zwar net wierklech geschitt, awer sou eriwwer komm, sou d'Liz Braz.

De Ben Polidori huet bedauert, datt d’Subside fir zum Beispill Fotovoltaik-Anlage just bei deenen ukommen, déi dat virfinanzéiere kënnen. D’DP hat am Walkampf versprach, dat z’änneren, an de Luc Emering deen am zoustännegen Aarbechtsgrupp ass, seet sech optimistesch wat d’Ëmsetzung ugeet.

"Mir hu jo de Virdeel bei den erneierbaren Energien, dass se sech deelweis selwer ofbezuelen, dat heescht, wa mer als Staat kënne mer dann effektiv, wier et méiglech, dass zum Beispill géing eng Photovoltaikanlag komplett virfinanzéiert ginn, dass dat wat d'Photovoltaikanlag bréngt, dat heescht de Verkaf vum Stroum an d'Netz, dass dat dem Staat seng Einnam ass iwwert déi éischt Jore bis d'Anlag ofbezuelen, an dass d'Leit duerno selwer Proprietär vun där Anlag kënne sinn. Dat wier zum Beispill ee Wee, wéi een och kéint déi Leit, déi soen, ech wëll aktive Klimaschutz bedreiwen, mee ech kann et net, wéi een déi kéint ënnerstëtzen."

Den neie liberale Parlamentarier fënnt däitlech Wierder bei de Prozeduren. Notamment beim Naturschutz hätte Beamten an de leschte Jore mat hiren Interpretatioune reegelméisseg de Rechtsstaat a Fro gestallt.

Fir d'Zukunft missten Delaie verkierzt an de Proportionalitéitsprinzip applizéiert ginn.

Krich, Konflikter a Flüchtlingen

Et géing ee sech Suerge maachen a géing deelweis eng Hëlleflosegkeet empfannen, sou d’Liz Braz, wann een international Krise vun hei aus suivéiert, de Krich an der Ukrain an d'Eskalatioun am Noen Osten. Fir de Ben Polidori gëtt et just eppes, dat ee maache kann.

"Dat ass de Leit hëllefen, de Leit hëllefen, ech mengen d'Leit, déi op der Flucht sinn, dat muss ee verstoen. Ech mengen, wa mir an deem Fall gewiescht wären, enzwousch géife wunnen, wou Bomme falen, ech mengen do géife mir och probéiere fortzekommen. Natierlech ass d'Situatioun eng ganz schwéier. Mir hunn och am Moment hei zu Lëtzebuerg divers Krisen. Elo kënnt dat doten nach dobäi an ech mengen, et och fir d'Leit dobaussen net einfach alles z'akzeptéieren."

Virun 2 Wochen hat den LSAP-Ausseminister faisant fonction Jean Asselborn Restriktioune fir den Hebergement vu Flüchtlingen annoncéiert. Déi nei LSAP-Deputéiert Liz Braz huet déi Decisioun verdeedegt. Et wier an de leschte Joren alles gemaach ginn, wat méiglech war.

“Mir sinn effektiv elo op deem schwéiere Punkt wou mer mussen erkennen, dass mer an der Flüchtlings-, virun allem an der Asylpolitik e klenge Cours-Wiessel mussen huelen, och wann dat u sech tragesch ass.”

Den DP-Deputéierte Luc Emering fënnt och, datt an de leschte Jore genuch gemaach gouf, fir d'Kapazitéiten an d'Luucht ze setzen.

"Background am Gespréich" leeft ëmmer samschdes an der Mëttesstonn (vun 12 bis 13 Auer) op RTL Radio Lëtzebuerg an am Livestream um Internet respektiv an der App (Audio a Video). Dono ass d'Emissioun op RTL.LU an um RTL Play zu all Ament nach eemol ze lauschteren oder ze kucken - an der Rubrik "Radio" bei Emissiounen "Background" wielen.