E Samschdeg war de Finanzminister Gilles Roth eisen Invité an der Emissioun Background am Gespréich um Radio.

Hien hätt véier Objektiver als Finanzminister: d'Nohaltegkeet vun de Staatsfinanzen, d'Kafkraaft vun de Leit, d'Kompetitivitéit vun de Betriber an d'Attraktivitéit vun der Finanzplaz.

"Mir wëssen, dass mer aus enger schwiereger Situatioun erauskommen", sou den CSV-Minister, deen drun erënnert huet, datt seng Partei an der Oppositioun och d'Krisemesurë vun der Regierung matgedroen huet. Fir d'Projete vun den nächste Jore géing hien awer méi e breede politesche Konsens ustriewen, wéi dat bis ewell de Fall war.

D'Steiererliichterungen, déi déi nei Regierung iwwert eng méi staark Upassung vum Barème un d'Inflatioun schonn decidéiert huet, géing de Leit an de Stéit hëllefen, fir hir Immobiliëprête kënnen zréckzebezuelen. Dat géing awer net duergoen, dofir wier zum Beispill nach geplangt, datt ee méi ka vun de Steieren ofsetzen, wann een e Prêt zréckzebezuelen huet.

Weider huet déi nei Regierung jo wëlles de Logementsmarché mat enger Rei Mesuren erëm unzekuerbelen. Dorënner den Taux vum Amortissement accéléré, deen erëm eropgesat gëtt a vun deem een och méi laang soll kënne profitéieren.

Aktuell hunn eng ganz Rei Leit Probleemer mat sougenannten Iwwergangskreditter, well si eng nei Wunneng kaaft hunn, déi si awer an dësen Zäiten net méi verkaaft kréien. Eng Méiglechkeet wier, fir ze kucken, ob dës e bësse méi laang kéinte gestreckt ginn.

Hien hätt dozou och scho Gespréicher mat der Bankenopsiicht a mat der Spuerkeess gehat. Vill Spillraum wier awer net. Eng weider Méiglechkeet fir de Leit ënnert d'Äerm ze gräifen wier, fir eventuell de perséinlechen Apport, deen ee muss bréngen, fir e Kredit ze kréien, duerch Garantië vum Staat z'ersetzen.

Mëttelfristeg soll de ganze Steiersystem eng Kéier op de Leescht geholl ginn. D'Zil vun där Reform wier d'sozial Gerechtegkeet, esou de Gilles Roth. Dat géing heeschen, Kleng- a Mëttelverdénger, sou wéi d'Steierklass 1A z'entlaaschten, wat duerch d'Inflatiounsberengegung zum Deel géing geschéien. Weider soll ee méi spéit ufänken, Steieren ze bezuelen an d'Tranchë méi breet gemaach ginn. D'CSV hat sech och fir e méi héije Spëtzesteiersaz agesat, ma e Koalitiounsprogramm wier e Kompromëss an dofir géing dat net kommen.

Ee weidert Haaptzil vum neie Minister si gesond Staatsfinanzen. Obschonn den aktuellen Trend nach e positive wier, dierft dat wat erakënnt net systematesch manner sinn, wéi dat wat eraus geet, esou de Gilles Roth. Dowéinst misst bei eenzele Projete gekuckt ginn, ob d'Ham ëmmer misst an der Mëllech gekacht ginn. D'Acquise vum Sozialstaat géingen awer net a Fro gestallt ginn.

Eng staark Wirtschaftsleeschtung bleift fir d'CSV de Schlëssel vu gesonde Staatsfinanzen, déi wichteg Investissementer an d'Finanzéiere vum Sozialstaat erméiglechen. Ob d'Fro wat geschitt, wann d'Regierung d'Wirtschaft net esou ugekuerbelt kritt, wéi geplangt, äntwert de Gilles Roth: "Dës Regierung ass ugetruede mat engem Plang A, mat engem Konzept, an deen zéie mir duerch am Interessi vum Land an am Interessi vun de Leit. Dat heescht, dass ee kuerzfristeg op d'Erausfuerderunge vun der Zäit, méi Kafkraaft d'nächst Joer, méi Logement, reagéiert. An da muss een déi néideg Modeller hunn, fir dass dat funktionéiert. An dat wäert och funktionéieren."

An den nächste Woche sti fir de Minister virop eng Rei Gesetzer um Programm, déi musse bis virum Enn vum Joer an der Chamber gestëmmt ginn. An duerno muss de Budget fir d'nächst Joer opgestallt ginn, an zwar esou dass méiglechst d'Schéier tëscht den Depensen an de Recetten net nach méi wäit ausernee geet, wéi bis ewell, esou de Minister.

Background am Gespréich mam Finanzminister Gilles Roth

"Background am Gespréich" leeft ëmmer samschdes an der Mëttesstonn (vun 12 bis 13 Auer) op RTL Radio Lëtzebuerg an am Livestream um Internet respektiv an der App (Audio a Video). Dono ass d'Emissioun op RTL.LU an um RTL Play zu all Ament nach eemol ze lauschteren oder ze kucken - an der Rubrik "Radio" bei Emissiounen "Background" wielen.