E Mëttwoch de Moie souze sech d'OGBL-Presidentin an de President vum Daachverband vum Patronat géintiwwer. Thema war de CovidCheck an de Betriber.

"Et fält elo denkbar schlecht..." Dat sot d’Nora Back e Mëttwoch de Moien zum Aféiere vum CovidCheck op der Schaff, vun dësem Samschdeg un. D’Presidentin vum OGBL an de President vun der UEL, de Michel Reckinger stounge sech an engem Face-à-Face op der Antenn géintiwwer.

D’Situatioun wier haut eng aner, wéi nach virun e puer Wochen, wéi déi Decisioun vum 3G op d’Schaff geholl ginn ass.

Face-à-Face: Nora Back vs Michel Reckinger

Den Haaptpunkt deemools war et fir d’Leit un d’impfen ze kréien, huet de Michel Reckinger präziséiert. En Drockmëttel, dat duerchaus funktionéiert hätt, wat sech um héijen Impf-Taux an de Betriber géif gesinn. De Vertrieder vum Patronat huet vu ronn 90 Prozent u vaccinéiertem Personal geschwat. Domadder misste just nach 10 Prozent vun e Samschdeg un op en Test hi kontrolléiert ginn. D’Patronat wier kloer Demandeur gewiescht fir dee System anzeféieren.

Et wier dem Nora Back no awer eben net op der Aarbechtsplaz fir do Drock ze maachen, a mat Existenzverloscht Angscht ze maachen. Et kéint net sinn, dass e Salarié aus eegener Täsch misst en Test bezuelen, fir dierfe schaffen ze goen. D’Fuerderung vun de Syndikater, dass Schnelltester sollte gëllen, gouf deemools verworf, mam Argument dass se näischt géifen daachen, an elo gëtt nees voll op se gesat, kritiséiert d’Nora Back.

Déi meescht praktesch Froen, fir den 3G an ze féieren, wiere gréisstendeels awer aus der Welt geschaaft. Nach wier awer net alles kloer, seet de Michel Reckinger, an huet dat einfacht Beispill vun engem Camion-Chauffeur zitéiert, deen am Ausland ënnerwee ass, an ee sech froe kann, op deen dann elo all Dag en Test muss eraschécken, oder falls e mat engem Impfstoff vaccinéiert ass, deen hei net unerkannt ass, zum Beispill de russesche Sputnik.

Wat eng Impfflicht ugeet, géif ee probéieren esou eng ëmzesetzen, wann d’Regierung dat géif decidéieren. Perséinlech wier hie fir eng Flicht, sou de Michel Reckinger, deen och frou ass, dass et elo endlech zu enger parlamentarescher Debatt doriwwer wäert kommen.

Den OGBL wéilt bei esou enger wichteger Fro wéi enger Impfflicht säin National-Comité befroen, wat an de nächsten Deeg soll geschéien. Et wier e ganz sensibelt Thema, an do dierfte perséinlech Meenungen net spillen, seet d’Nora Back.

Ee grousse Problem, do waren sech déi zwee Invitéen am Face-a-face eens, ass d’Fro, wat am Fall vun enger Impfflicht mat de ville Frontalieren ass. Do hätte weder Gewerkschaften, nach d’Patronat haut eng Äntwert drop, ausser dass et schwiereg dierft ze kläre ginn.

Den OGBL wiert sech iwwerdeems géint eng sektoriell Impfflicht. De Michel Reckinger versteet net, wéi et esou eng an de Spideeler an an de Fleegeberuffer bis haut nach net géif ginn.

Omikron hätt aktuell Konsequenzen op d’Aarbechtswelt, well vill Leit duerch eng Isolatioun géifen ausfalen. A verschiddene Beräicher géif et déi Enkpäss elo scho ginn, an déi Situatioun wäert eis och elo eng Zäit begleeden, fäert d’Patronat.

Et géife sécher Härtefäll beim CovidCheck bleiwen, mengt d’Nora Back. Den "normalen" Oflaf wier gekläert, mä ganz sécher wäerte sech vun e Samschdeg un Situatioune weisen, déi da Problemer mat sech bréngen. Den OGBL fuerdert och weiderhin e Plafonnement vum Präis fir e Covid-Test.

Kee Verstees-de-mech huet d’Nora Back fir eng Propositioun vu Patronatssäit, fir dass net-geimpfte Leit am Fall vum Kontakt mat enger infizéierter Persoun Congé misst huelen, fir an d’Quarantän. De Michel Reckinger gesäit dodran nämlech eng weider Méiglechkeet, wéi net-geimpften Leit net bräichten op d’Schaff ze kommen. Dat wier net säi Verständnis vu Solidaritéit, esou den UEL-President, an am Ausland géif et et jo och schonn deels ginn.