Am Face-à-Face goung et ëm déi kleng, nei Parteie Fokus a Liberté-Fräiheet, déi bei de Chamberwalen 2023 untrieden.

E Sonndeg presentéiere sech am Ganzen 12 Parteien de Wieler an an eisem leschte Face-à-Face hu mir eis dofir mat de klengen, neie Parteie Fokus a Liberté-Fräiheet beschäftegt.

Hie géif ganz wéineg Gemeinsamkeeten tëscht béide Parteie gesinn, sot de Frank Engel. D'Partei Fokus wier zanter annerhallwem Joer opgebaut ginn an déi soll och net muer nees verschwannen. Am meeschten ënnerscheede mécht ee sech bei de Positiounen zu der EU, der NATO oder der Weltgesondheetsorganisatioun, fënnt de Roy Reding, dee Liberté-Fräiheet och éischter als eng Beweegung gesäit, déi awer, sollt se e Sonndeg genuch Ënnerstëtzung kréien, zu enger Partei opgebaut gëtt.

Eng Alternativ zu den etabléierte Parteien

Dass et iwwerhaapt e Sonndeg eng Dose Parteie sinn déi untrieden, dat hätt e Grond, an zwar, dass se mat den aktuelle Strukturen a Politicke vu de gréissere Volleksparteien net d’accord sinn – do ware sech béid Politiker eens. Vill Leit kéinte mat der "Onbeweeglechkeet" an mat der "Vergaangenheetsverhaftheet" vu grousse Parteien näischt méi  ufänken. Wärend Joerzéngten hätte 4 Parteie regéiert, a wärend där Zäit wier näischt geschitt, fir Problemer ze léisen, déi eis och haut nach ëmmer begleeden, kritiséiert de Fokus-Spëtzekandidat.

De Roy Reding fënnt däitlech Wieder: d‘Politik an d‘Parteien hätten a ganz ville Beräicher versot. Fir de Liberté-Fräiheet Spëtzekandidat muss d‘Haaptprioritéit vun enger nächster Regierung d‘Präisdeierecht an d‘Veraarmung vun de Leit sinn. A sengen Ae missten d‘Spritpräisser erofgedréckt ginn, andeems een d‘CO2-Steier ofschaaft.

Mer missten eis mol endlech driwwer eens ginn, wat mer aus Lëtzebuerg wëlle maachen, fuerdert dogéint de Frank Engel a kritiséiert de sënnlose Wuesstemsmodell, an deem de Grand-Duché stécht. De Modell géing oprecht erhale ginn, well een domadder "ad infinitum" d‘Pensioune wéilt finanzéieren. De Wuesstem net a Fro ze stellen, géing just dozou féieren, dass mer méi am Stau sinn, eis manner beweegt kréien an och de Logementsproblem net an den Grëff kréien, sou de Fokus-Spëtzekandidat.

Een anere Staat

Et si vill ze wéineg normal Mënschen an der Chamber a vill ze vill Beruffspolitiker, ass eng Kritik vu Liberté-Fräiheet. Ministere sollen dofir och keng Politiker méi sinn. Dat solle Leit vum Fach sinn, déi ënnert der Kontroll vun der Chamber fonctionéieren a sech dorop konzentréieren, hir Aarbecht ze maachen. Wat en Auslännerwalrecht ugeet, bleift Liberté-Fräiheet iwwerdeems strikt dogéint.

Dat gesäit de Frank Engel ganz anescht. Et kéint een net einfach d‘Regierung den Technokraten iwwerloossen an donieft wier et net normal, dass eng Hallschent vum Land sozial Cotisatiounen a Steieren bezilt an awer net dierf wielen. Fokus steet fir méi Participatioun an d‘Diskussioun iwwer d'Auslännerwalrecht sollt mol nees méi an der Ëffentlechkeet debattéiert ginn.

Wat maache géint ëmmer méi Aarmut?

Aarmutsbekämpfung war e weidere Sujet e Freideg de Moien am Face-à-Face. Et bräicht eng Steierreform fënnt de Roy Reding. D‘Aarbecht misst manner besteiert ginn. Op d‘Fro, ob d‘Kapital da sollt méi besteiert ginn, äntwert de Roy Reding, "Nee" et misst een einfach manner Suen ausginn. Zum Beispill kéint ee bei de Militärausgabe spueren a Referenden driwwer maachen, ob Lëtzebuerg nach Member sollt si bei der NATO an ob Lëtzebuerg net soll wéi d‘Schwäiz neutral ginn.

"Sou een einfacht Weltbild hätt ech och gär", äntwert dorop de Frank Engel. Wat d‘Aarmutsbekämpfung ugeet, misst een dofir suergen, dass dat, wat e Mënsch hei am Land ka verdéngen, duergeet, fir dezent ze liewen. Logement inclus an dat wier hei net de Fall. An dofir hätt déi Fro vum Logement an dëser Campagne och missen dominéieren an net déi vun de Steieren, kritiséiert de Frank Engel.

Face-à-Face: Frank Engel (Fokus) vs. Roy Reding (Liberté - Fräiheet)


Nationalwalen - D'Kandidaten an der Iwwersiicht