E Dënschdeg de Moie war den Aarbechtsminister a Vizepremier eisen Invité vun der Redaktioun.

Den Etat de Crise ass net den Ament, fir eng Tripartite ze maachen. D'Regierung hätt dat vun Ufank u gesot. Eng Tripartite misst och organiséiert ginn. D'Reunioun e Mëttwoch wier eng Preparatiounsronn, dowéinst gesäit d'Regierung Patronat a Gewerkschaften och getrennt. Mëtt Juli wier dann de richtegen Zäitpunkt, fir eng gemeinsam Dräierronn. Dat sot den Aarbechtsminister a Vizepremier Dan Kersch en Dënschdeg de Moien am RTL-Interview.

Mir si kloer an enger struktureller Kris. D'Problemer vun deem enge Secteur gräifen op deen aneren iwwer, huet den LSAP-Minister erkläert. Sécher wär jo, datt de Chômage partiel bis Enn des Joer weiderleeft, mä d'Modalitéiten nom Etat de Crise mussen elo definéiert ginn. Knapp 800 Milliounen Euro huet d'Kuerzaarbecht bis ewell kascht.

Resumé: Invité vun der Redaktioun - Dan Kersch / Rep. Annick Goerens

D'lescht Woch war de Konjunkturcomité beieneen. Den Dan Kersch hat och d'Presidente vun OGBL, LCGB an UEL invitéiert, fir driwwer ze schwätzen a war dono guer net frou, datt Detailer matten an der Diskussioun un d'Ëffentlechkeet gedroe goufen. Dat géif d'Saach net méi einfach maachen, fënnt den Dan Kersch. Un engem gemeinsamen Dësch - also fir eng Tripartite - misst ee sech un d'Reegelen halen, soss géif et kee Sënn maachen.

Fir als Betrib z'iwwerliewen, misst ee sech elo nei organiséieren dierfen, also Leit entloossen – och an der Kuerzaarbecht. Dat heescht och Entloossunge wäre méiglech, och wann een als Entreprise Kuerzaarbecht kritt. Dat sollen der awer sou mann wéi méiglech sinn, ënnersträicht den LSAP-Aarbechtsminister.

Ënnert anerem den LCGB ass domat guer net averstanen.

En Dënschdeg de Mëtteg gëtt weider am Konjunkturcomité iwwer déi zukünfteg Modalitéite vun der Kuerzaarbecht diskutéiert.

Invité vun der Redaktioun: Dan Kersch

Rendez-vous fir den Interview mam Invité vun der Redaktioun all Dag vu méindes bis freides um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op der App ass d'Emissioun dono och am Replay ze fannen.