E Mëttwoch war de Porte-Parole vun der Covid-19-Task-Force eisen Invité vun der Redaktioun.

D'Zuelen schwätzen eng kloer Sprooch an d'Wëssenschaft kann nëmmen weider un d'Leit appelléieren, d'Mesuren anzehalen a sech testen ze loossen, dat sot de Porte-Parole vun der Covid-19 Task Force, de Mikrobiolog Paul Wilmes,  am RTL-Interview, zu der aktueller Hausse bei de Corona-Virus-Infektiounen hei am Land.

Invité vun der Redaktioun: Paul Wilmes

Ass den Deconfinement ze fréi komm? Dat wier net anzeschätzen, sou de Professer vun der Uni Lëtzebuerg.

Et wier eng kritesch Situatioun, den Ablack, wou een net weess a wéi eng Richtung et geet! Dat misst ee kloer am An behalen.

Dem Paul Wilmes no si mer den Ament éischter an engem zweete Pic vun der éischter Well wéi am Ufank vun enger zweeter Coronawell. Et hätten ni Deeg ginn zu Lëtzebuerg, an deene keng Nei-Infektiounen derbäi sinn.

Déi nei Fäll sinn haaptsächlech duerch Infektiouns-Cluster gedriwwen, dat heescht duerch grouss Usammlungen vu Leit. Manner an de Schoulen, mä éischter op de Partyen. Et gëtt awer och sporadesch Fäll vu Persounen, déi sech am enke Kontakt mat Aneren ugestach hunn. Dat Ganzt wier ebe gedriwwen duerch sozial Kontakter.

Duerfir misst ee weider oppassen. Och dobaussen. Eng nei Etude vun Uganks der Woch vun 240 Wëssenschaftler hu rausfonnt, datt och an der frëscher Loft opzepassen. Och dobaussen sollt ee bei enkem Kontakt eng Mask undon, sou de Paul Wilmes

Déi aktuell Courbe wier méi flach wéi um Ufank vun der Pandemie. Mä de Verlaf kéint sech awer ganz séier nees acceleréieren an da wier een nees an deem selwechten Zeenario wéi am Mäerz, sou de Mikrobiolog. Sollt nees eng Kéier eng staark Hausse vun den Infektiounen kommen, wéi den Ament beispillsweis an Israel, wier een nees séier an enger akuter Phas.

Den Ament wier eng rabiat Léisung wéi e komplett neie Lockdown, sou effektiv en och war,  awer op alle Fall net ubruecht. Ob e Lockdown ee fir alle Mol ze evitéieren ass, dat géif awer vu ville Facteuren ofhänken. Notamment vum Contact-Tracing. Wann den Tracing net méi garantéiert ass, komme mer an eng Dynamik, déi nëmmen nach schwéier ze kontrolléieren ass, huet eisen Invité vun der Redaktioun gewarnt.

Mat 60 neie Fäll den Dag stéisst d'Inspection sanitaire un hir Limitten. Eng Tracing- App wier en effikasst Instrument, confirméiert de Mikrobiolog.

Mä och bei sou enger App parallel zum analogen Tracing missten d'Leit vu sech aus matmaachen, d'nämmlecht wei beim "Large Scale Testing". Den Ament maachen iwwer 50% vun de Leit mat.

Rendez-vous fir den Interview mam Invité vun der Redaktioun all Dag vu méindes bis freides um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op der App ass d'Emissioun dono och am Replay ze fannen.