E Mëttwoch de Moie war de Generaldirekter vun den Hôpitaux Robert Schuman eisen Invité vun der Redaktioun.

„Dat, wat mer Suerge mécht, ass net d'Covid-Versuergung, mä déi vun den Net-Covid-Patienten.“ Nach geet et a mir hu Capacitéiten, mä kee weess wéi et weider geet, well mer eng ganz aner Situatioun hu wéi an der 1. Well. Dat sot e Mëttwoch de Moien den Dr. Claude Schummer, Generaldirekter vun den Hôpitaux Robert Schuman, zu deem och d'Spidol um Kierchbierg gehéiert.

Dës Well wär ganz anescht, well et kee Confinement gëtt. Et kéint een deemno guer net plangen oder wësse wéi sech d'Situatioun weider entwéckelt.

Den Ament wären d'Zuele vun de Corona-Patienten héich. 23 Patienten hat een um Mëttwoch de Moien am Spidol um Kierchbierg. Eng Unitéit ass voll, dat heescht ee Service huet missen zougemaach gi fir COVID-Patienten ze versuergen. 5 Patiente sinn am Ablack op der Internsivstatioun, 4 dovunner intubéiert.

Den Dr. Schummer fäert, datt ee riskéiert mat Covid-Patienten iwwerrannt ze ginn. Den Ament wäre scho vill Saachen ofgesot. 100% Urgencen, 100% Kriibsbehandlung a 50% Operatioune kéint een de Moment assuréieren, mä wéi gesot kee weess wéi laang nach.

D'Personal ass de gréisste Problem, seet och de Spidolsdirekter. Eng 60 Leit feelen de Moment wéinst Quarantän oder Isolatioun. Derbäi kommen déi normal Krankeschäiner a vum Congé, deen d'Leit ze gutt hunn, den Ament net ze schwätzen.

Et hätt een och gesot kritt, datt ee kee Personal méi soll an d'Ausland rekrutéiere goen. D'Angscht ass do, datt d'Belsch oder Frankräich hir Leit kéinte beschlagnamen.

Et gëtt och gekuckt, d'Spideeler z'entlaaschten, verstäerkt Covid-Patienten net an de Spideeler, mä doheem oder an engem CIPA ze behandelen, mat der Ënnerstëtzung vum Hausdokter.

Et kritt een och elo vun der Santé erlaabt, datt Personal a Quarantän, dat also e potentielle Risiko-Kontakt hat mä net positiv getest ass, mat Schutzmoossname ka schaffe kommen.

Soss wären eng Rei Aktivitéiten an de Spideeler net méi méiglech, sou den Dr. Claude Schummer.

Vun en Donneschdeg un ass och kee Besuch méi an de Spideeler vun den Hôpitaux Robert Schuman erlaabt, dat heescht um Kierchbierg, an der Zithaklinik oder dem Spidol Sainte-Marie zu Esch. Et gëtt de Verdacht, datt Visiteuren, déi sech am Zëmmer net un d'Reegele gehalen hunn, de Virus mat erabruecht hunn.

Et ginn awer Ausname beim Besuch... Elteren, déi bei hir Kanner kommen. Pappe kéinten natierlech bei der Gebuert derbäi sinn an a kritesche Fäll wären och Visitte méiglech.

D'Hôpitaux Robert Schuman produzéieren zanter Kuerzem och hir eege Masken. 40'000 sinn et der de Moment den Dag.

Geplangt ass och, datt Enn des Joers FFP2-Masken hei zu Lëtzebuerg produzéiert ginn, déi also nach méi en héije Schutz bidden.

Invité vun der Redaktioun: Dr. Claude Schummer

Wéinst engem technesche Problem ass leider kee Video-Replay vun dëser Emissioun opgeholl ginn. Mir entschëllegen eis dofir.
Rendez-vous fir den Interview mam Invité vun der Redaktioun all Dag vu méindes bis freides um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op der App ass d'Emissioun dono och am Replay ze fannen.