En Dënschdeg de Moie war de Chef vum parlamentaresche Grupp vun der ADR eisen Invité vun der Redaktioun.

Biologesch Realitéiten däerfen net duerch ideologesch Konstruktiounen ersat ginn. Esou kommentéiert den ADR-Deputéierte Fernand Kartheiser d'Pappen-Diskussiounen. Eng Diskussioun, déi jo vun der ADR lassgetrëppelt gi war.
De Chef vum parlamentaresche Grupp sot en Dënschdeg de Moien am RTL-Interview, datt d'Argumenter vun de Gréngen net zefriddestellend wieren. D'ADR hätt an de Gesetzprojet 7674 d'Termë „mère“ a „père“ geschriwwen. Souwisou wier een als ADR jo géint kënschtlech Befruchtungen an och géint sougenannt Leihmutterschaften, sou de Fernand Kartheiser.

Wat d'Gesetz ugeet, hätt een eng Alternativ proposéiert déi de Leit de Choix géing loossen, wéi se sech wëllen nennen.
Et hätt een och keen opgestëppelt. Wat d'Reaktiounen op sozialen Netzwierker ugeet, sou kéint een net vun de Bierger verlaangen, datt se d'Gesetztexter am Detail géinge kennen.
Et wier een op alle Fall keng Partei déi diskriminéiert. Mä et misst een d'Perspektiv vum Kand kucken an et wéilt ee keng Kommerzialiséierung vu Mënschen.

Bei de Covid-Gesetzer dierft een sech net dru winnen, datt eis Grondrechter ausser Kraaft gesat sinn, sou de Fernand Kartheiser. De Staat géing an dëser Pandemie net maache wat e soll. Zum Beispill wieren eeler Leit an den Alters- a Fleegeheemer net genuch protegéiert ginn. D'ADR géing iwwregens den Horesca-Beräich ënner strikten Oploen nees opmaachen.

Mir misste léiere mam Virus ze liewen. Dernieft wier d'Regierung iwwerhaapt net op nei Grenz-Fermeturë virbereet, déi am Raum stéingen.

D'CSV wier iwwregens vum Prinzip hier e Koalitiounspartner fir d'ADR, ma d'CSV wier grad schwaach, hätt keng Linn a wéisst selwer net méi, firwat se eigentlech nach stéing, esou de Fernand Kartheiser.

De Claude Wiseler hätt bei de leschte Walen e grousse Feeler gemaach an zwar hätt en eng biergerlech Koalitioun tëscht CSV an ADR ausgeschloss. Domat hätt een de Leit d'Alternativ zu Blo-Rout-Gréng geholl.

Invité vun der Redaktioun: Fernand Kartheiser

Rendez-vous fir den Interview mam Invité vun der Redaktioun all Dag vu méindes bis freides um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu, op der App an am RTL Play ass d'Emissioun dono och am Replay ze fannen.