En Dënschdeg de Moie war de Santé-Virolog eisen Invité vun der Redaktioun.

#Lëtzebuergtestsech

Et geet drëms, sou vill Infektioune wéi méiglech z'entdecken. Datt manner nei Fäll an den nächste Wochen derbäi kommen an datt ee ka Coronamesurë vermeiden. Dat sot den Dr. Thomas Dentzer, Virolog bei der Santé, en Dënschdeg de Moien iwwer déi aktuell Test-Aktioun. En Dënschdeg an e Freideg soll een e Schnelltest maachen. All Stot krut e Bong heem geschéckt, fir eng Këscht Tester an d'Apdikt sichen ze goen. Déi Erwuesse solle sech testen, fir besser ze wëssen, wéi vill Virus genee zu Lëtzebuerg zirkuléiert.

Ech gleewen un d'Tester, seet den Dr. Dentzer. Wann ee Symptomer huet an den Test ass positiv, wier et bal ëmmer esou, datt ee Corona huet. Ass ee krank an den Test ass negativ, kéint een zimmlech gutt ausschléissen, datt ee Corona hätt. Och elo fir d'Feierdeeg oder wann ee soss zu méi zesumme kënnt, soll ee virdrun e Schnelltest maachen.

D'Test-Capacitéiten an de Laboe sinn deels un hire Limitten. Déi ginn ausgebaut, sou de Virolog vun der Santé.

Lëtzebuerg huet jo och en éischte Fall vun der Omikron-Variant. Dat wier net verwonnerlech, am Ausland wär de Virus jo och. Dës Variant ass däitlech méi ustiechend, wat e Problem ass, well et da méi Infektioune gëtt. Mä déi nei Variant géif awer net onbedéngt méi krank maachen. D'Impfung géif weider e Schutz bidden, speziell déi drëtt Impfung.

Bis zu 6.000 Leit den Dag hu sech d'lescht Woch am Kader vun der nationaler Impfwoch impfe gelooss. Eng 1.000 dovunner waren éischt Impfungen. Awer och vill Booster-Impfungen. De Bilan vun der Impfwoch wier deemno positiv, fënnt den Dr. Dentzer. Et sinn awer och nach ze vill Leit net geimpft. Do misst een nach Efforte maachen. D'Impfoffer misst dowéinst weider grouss bleiwen, wat net ëmmer evident wier, well et wier schonn eng logistesch Erausfuerderung.

D'Booster-Impfung reservéiert een am beschte mat Rendez-vous an engem Impfzenter. Dat geet am séiersten.
An Zukunft kann och Moderna beim Hausdokter geimpft ginn. D'Logistik hei wier awer méi schwiereg.

Invité vun der Redaktioun: Dr. Thomas Dentzer

Rendez-vous fir den Interview mam Invité vun der Redaktioun all Dag vu méindes bis freides um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op RTL Play ass d'Emissioun dono och am Replay ze fannen.