E Méindeg de Moie war den Ombudsman fir Kanner a Jugendlecher eisen Invité vun der Redaktioun.

Kanner stelle sech vill Froe wéinst dem Krich an der Ukrain. Eltere sinn elo gefuerdert, fir Äntwerten ze ginn, mee och fir de Kanner d'Ängschten ze huelen, ouni awer ze banaliséieren. Dat sot den Ombudsman fir Kanner a Jonker, de Charel Schmit, de Méindeg de Moien als eisen Invité vun der Redaktioun.

Et sollt een och zouginn, wann een eppes net weess an dann zesummen no Erklärunge sichen. Wichteg wier et, dass ee mam néidege Recul an a Moossen d'Situatioun suivéiert an net virun de Kanner stänneg um Handy live beim Krich wëll dobäi sinn. Dat wier och fir Erwuessener net gutt.

Kanner, déi nach keng 9 Joer hunn, sollten am beschten nach guer keng Noriichte fir Erwuessener konsuméieren. Wann d'Tëlee leeft, wier et wichteg, d'Biller an d'Noriichte fir méi eeler Kanner a Jonker anzeuerdnen an ze erklären.

Kannerniuuss op RTL

Eng gutt Method, fir Ängschten awer och Hoffnungen ze kanaliséieren, wier zum Beispill Molen a Bastelen. De Charel Schmit huet virgeschloen, sech op positiv Aspekter ze fokusséieren. Wéi een de Leit hëllefe kann, déi hu misse flüchten, kéint esou eng praktesch a positiv Approche sinn. Domadder kéinte Kanner méi ufänke wéi mat theoreteschen Erklärungen.

D'lescht Woch gouf da vum Service National de l'Enfance en Elterebréif mat Rotschléi verdeelt, wéi ee mat Kanner iwwert déi aktuell Situatioun schwätzt.

Dacks versetze sech Kanner och an d'Lag vun de betraffene Leit, op der Tëlee an am Internet gesäit een och Kanner, déi flüchten. Da fille sech d'Kanner hei nach méi betraff a froe sech, ob de Krich och bei eis kéint kommen. Op dës Fro wier et wichteg ze relativéieren, esou den Ombudsman fir Kanner a Jonker. Wat méi jonk, wat d'Kanner nämlech manner gutt Gefore kënnen aschätzen. Do kéint een also soen, dass de Risiko relativ kleng ass an de Kanner domadder Sécherheet vermëttelen. Eng Méiglechkeet kann et och sinn, sech op dat ze konzentréieren, wat grad ass an zum Beispill doriwwer, wéi de Kanner aus der Ukrain och hei am Land gehollef gëtt.

De Charel Schmit begréisst, dass Leit, déi hu misse flüchten, elo onkomplizéiert sollen opgeholl ginn. Ma et sollt een awer verhënneren, dass et zu Spannunge mat anere Refugiéë kënnt, déi scho méi laang hei am Land sinn. Et sollt och verhënnert ginn, dass et zu Ongläichheete kënnt, Kanner géingen och mierken, wann hir Eltere beispillsweis net schaffen dierfen, well si keng Erlabnis hunn an Eltere vun anere Flüchtlingskanner dat awer kënnen, esou de Charel Schmit. Och d'Wunnsituatioun wier e Polverfaass. Et wier un der Politik, fir mat de Gemengen ze kucken, wou eventuell Wunnengen eidel stinn oder aner Alternativen ze fannen, fir dass d'Leit kënnen ënnerkommen. All Kand sollt gehollef kréien, ouni tëscht den Hierkonftslänner vun de Refugiéen ze ënnerscheeden, huet de Charel Schmit, Ombudsman fir Kanner a Jonker, nach betount.

Invité vun der Redaktioun: Charel Schmit

Kontakt:

Kanner-Jugend-Telefon 116111
Elterentelefon 26 64 05 55
http://okaju.lu

Rendez-vous fir den Interview mam Invité vun der Redaktioun all Dag vu méindes bis freides um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op RTL Play ass d'Emissioun dono och am Replay ze fannen.