En Donneschdeg de Moie war de Chef am Service vum "Indice des Prix" vum Statec eisen Invité vun der Redaktioun.

Am Mäerz louch d'Präisdeierecht bei 6,1%. Wéinst den antizipéierte Präishaussë fir déi nächst Méint gouf jo op der Tripartite decidéiert, déi probabel nächst Indextranche am August op den Abrëll d'nächst Joer ze verréckelen. En Donneschdeg de Moien huet de Marc Ferring, de Chef vum Service Indice des Prix vum Statec, en Abléck ginn, wéi de Statec de Präisindex erfaasst. Fir de ganze Spektrum vum Konsum vun de Leit ofzedecken, ginn am Präisindex ganz ënnerschiddlech Produiten a Servicer consideréiert. Dozou gehéieren Tubak, Alkohol, Miwwelen, Schong, Kleeder, mä och de Loyer, Gas, Stroum, oder Dokteschrechnungen an Assurancen.

All Produktkategorie huet eng eege Gewiichtung, zum Beispill hate Vakanze wärend der Pandemie elo eng manner héich Gewiichtung wéi soss, well d'Leit manner an d'Vakanz gefuer sinn.

Alles an allem sammelt de Statec pro Mount méi wéi 66.000 Präisser vu Produiten a Servicer. Am Verglach: am alleréischte Präisindex an den 1920er Jore ware grad emol 19 Grond-Produkter, haaptsächlech Liewensmëttel, Seef an e puer Kleedungsstécker am Wuerekuerf.

Obschonn zu Lëtzebuerg vill Leit Proprietär vun hirer Wunneng sinn, ginn dës Depensen – am Géigesaz zum Loyer – net matgerechent, wann de Präisindex erhuewe gëtt. Eisen Invité vun der Redaktioun huet erkläert, datt wier dorobber zréckzeféieren, well d'Produktkategorien, mat deenen de Verbraucherpräis gerechent gëtt, op europäeschem Niveau festgeluecht sinn an harmoniséiert goufen. All Land huet deemno déi selwecht Produktkategorien. Esou kann den Index an d'Inflatioun uechter Europa matenee verglach ginn.

Ee Land kann awer och net am Elenggang zousätzlech Produite mat eran huelen, respektiv Posten eraushuelen. Dat géif net nëmmen d'Inflatioun verfälschen, mä och géint d'europäesch Reglementatioun verstoussen.

De Loyer huet den Ablack am Präisindex eng Ponderatioun vun 8%, wat och net méi onbedéngt de reellen Depensë vun de Stéit entsprécht, sou de Marc Ferring. De Kaf vun enger Immobilie gëtt als Investitioun gewäert an dowéinst net am Verbraucherpräisindex opgelëscht. Zanter zwanzeg Joer géif zwar op europäeschem Niveau driwwer geschwat ginn, wéi een de Privatleit hiren Ausgabe fir d'Wunneng och kéint am Präisindex Rechnung droen. Bis elo awer ouni Resultat.

D'Energiepräisser, déi jo bekanntlech den Ament d'Inflatioun am meeschten no uewen dreiwen, aus dem Index, also der „échelle mobile des salaires“ raus ze rechnen, wier sécher technesch mat statistesche Methode méiglech, sou de Statec-Vertrieder. Zum Beispill géif och d'CO2-Steier net berécksiichtegt gi fir den Index, deen d'Paien an d'Pensioune bestëmmt. Ob dat awer politesch gewollt ass, dat stéing op engem anere Blat, sot de Marc Ferring.

Invité vun der Redaktioun: Marc Ferring

Rendez-vous fir den Interview mam Invité vun der Redaktioun all Dag vu méindes bis freides um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op RTL Play ass d'Emissioun dono och am Replay ze fannen.