E Méindeg de Moie war de Fraktiounspresident vun der DP eisen Invité vun der Redaktioun.

Wa méi ewéi eng Indextranche bis 2024 muss verréckelt ginn, da kënnt d'Tripartite rëm zesummen. D'Regierung an d’Sozialpartner mussen da kucken, a wéi wäit d'Tranchë kënne "gestreckt" ginn. Dat huet den DP-Fraktiounschef Gilles Baum e Méindeg de Moien hei op RTL erkläert.

Hien huet awer garantéiert: "Et fält keng Indextranche ewech". Och wann 2, 3 oder méi Tranchë matenee missten op den 1. Abrëll 2024 ausbezuelt ginn, wat d'Betriber net géinge packen? Op déi Fro huet de Gilles Baum geäntwert: "da muss ee kucken, ob ee se streckt op d'Joer 2024, vläicht op d'Joer 2025, vläicht zwou..., mä wéi gesot, et ass ganz schwéier ze soen, a wéi eng Richtung dat et geet".

Fir de Verloscht u Kafkraaft ze kompenséieren, deen duerch d'Verréckele vun Indextranchen entsteet si jo degressiv Steierkreditter virgesinn, bei deene Gehälter bis zu 100.000 Euro Brutto d'Joer souguer iwwerkompenséiert ginn. De Gilles Baum hat am Oktober an der Emissioun Kloertext hei op RTL Tëlee e Mëttelakommes bei 9.000 Euro Brutto de Mount geschat - wat mat engem 13. Mount engem Joresgehalt vun 117.000 Euro entsprécht. Op d'Fro, ob d'Kompensatiounsmesurë bis méi héich Gehälter solle goen, wéi den OGBL verlaangt huet, huet de Gilles Baum kloergestallt, hien hätt 9.000 Euro fir eng Koppel gemengt. Wann een dat duerch zwee deelt, wier ee jo da bei 4.500 Euro.

Mat 4.500 Euro Brutto kann ee sech awer kaum nach eng Wunneng hei am Land leeschten. Wann d'Zënsen elo eropginn, misst ee bei engem Prêt vun 800.000 Euro en plus nach 500 Euro de Mount méi bezuelen, hat de Piratendeputéierte Sven Clement e Samschdeg am Background gerechent. De Gilles Baum sot déi do Rechnung hätt hien nach net gemaach, well een nach net wéisst, wou d'Zënspolitik genee higeet. Hie fënnt d'Rechnung awer "iwwerdriwwen".

Den DP-Fraktiounschef huet sech da géint eng Upassung vun der Steiertabelle un d'Inflatioun ausgeschwat, well déi 600 Milliounen Euro d'Joer géing kaschten a besonnesch déi héich Gehälter géing entlaaschten. Eng Hausse vum Spëtzesteiersaz vun 42 op 45% géing iwwerdeems - Berechnungen no - dem Staat just 50 Milliounen Euro erabréngen. Wat dem Gilles Baum no a Krisenzäite wichteg wier, dat wier déi Leit z’ënnerstëtzen, deenen et net gutt geet. Op der anerer Säit dierf een net "auf Teufel komm raus Steierreforme maachen, déi mer duerno mussen zeréckbezuelen". D'DP stéing och fir sécher an nohalteg Staatsfinanze fir d'Regierungen a Generatiounen "déi no eis kommen", sou de Gilles Baum.

Causa Dieschbourg: kee Feeler maachen

Den DP-Fraktiounschef huet sech e Méindeg de Moien iwwregens dofir ausgeschwat, datt d'Ex-Ëmweltministesch Carole Dieschbourg vun der Police judiciaire gehéiert gëtt. Dem Gilles Baum no wier wichteg, datt si sech dierf an der Gaardenhaischen-Affär erklären, mee dat misst awer net op der Place publique sinn. Si hätt d'Recht, fir sech ze verdeedegen an d'Recht op d'Présomption d'innocence. Wat am Wichtegste wier, dat wier elo kee Feeler ze maachen an dofir géing d'Chamber och de Verfassungsexpert Luc Heuschling e Méindeg héieren.

Invité vun der Redaktioun: Gilles Baum

Rendez-vous fir den Interview mam Invité vun der Redaktioun all Dag vu méindes bis freides um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op RTL Play ass d'Emissioun dono och am Replay ze fannen.