Dat sot en Donneschdeg de Vize-President vun der Arméisgewerkschaft SPAL als eisen Invité vun der Redaktioun.

D'Arméi ass gutt opgestallt fir d'Zukunft beim Budget an der Villfalt vun de Missiounen, beim Rekrutement an der Planifikatioun a virun allem der Attraktivitéit vum Beruff géif et awer nach vill Sputt no uewen ginn, sot en Donneschdeg de Moien de Vizepresident vun der Arméigewerkschaft SPAL am RTL-Interview. Den Tom Braquet war eisen Invité vun der Redaktioun.

De Personalmanktem wier scho bal eng Traditioun an der Lëtzebuerger Arméi. Déi fräi Plaze kéinten net besat ginn. Et géife sech net genuch Leit fir déi fräi Plaze mellen, doduerch géif ee riskéieren, och den Erausfuerderungen net gerecht ze ginn, warnt den Tom Braquet. Dem Vizepresident vum SPAL no ass den Examen e grousse Problem an datt een an direkter Konkurrenz mat der Police an dem CGDIS steet. An deem Kontext waart och d'Arméisgewerkschaft ongedëlleg op déi annoncéiert Reform vum Arméisgesetz, déi d'Karriärsméiglechkeeten um Härebierg verbessere soll. Donieft géif och d'Fidelisatioun net funktionéieren, fir d'Zaldote méi laang bei der Staang ze halen. Den Ament géifen net genuch Leit nom Militärdéngscht als Beruffszaldot um Härebierg bleiwen. D'Arméi huet eng ronn 1.000 Leit, dovunner 400 Beruffszaldoten an de Rescht Fräiwëlleger an Zivilisten. Op d'mannst 100 weider Zaldoten a 50 Beruffszaldoten géife nach gebraucht ginn.

De geplangte Belsch-Lëtzebuerger Batailloun am Kader vun den Nato-Verflichtunge begréisst d'Gewerkschaft prinzipiell. Et hätt een awer bis elo nach keen Iwwerbléck, wéi vill Lëtzebuerger Zaldoten da lo duerfir gebraucht géife ginn. Den Arméisminister an de Chef d'Etat Major hätten nämlech ënnerschiddlech Zuele genannt. Sécher wier awer, datt d'Rekrutéierungsmaschinn ganz séier misst ugehäit ginn.

Fir Onmutt suergt bei den Arméisgewerkschaftler och déi sougenannte Loi Rico. Do geet et ëm d'Kompensatiounszäite vun den Trainingen, déi d'Zaldoten ze gutt hunn. Eigentlech war 2019 een Accord tëscht der CGFP an dem Minister fonnt ginn. Elo géing dat alles 3 Joer méi spéit ouni Grond  iwwer Bord gehäit ginn. 1 Stonn wier just nach eng hallef wäert an dat wëll sech de SPAL net gefale loossen, sou de Vize-President vun der Arméisgewerkschaft Tom Braquet.

Invité vun der Redaktioun: Tom Braquet

Rendez-vous fir den Interview mam Invité vun der Redaktioun all Dag vu méindes bis freides um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op RTL Play ass d'Emissioun dono och am Replay ze fannen.