En Donneschdeg de Moie war de Fabio Spirinelli vum Mieterschutz eisen Invité vun der Redaktioun.

Méi Transparenz an eng Brems fir d'Locatiounspräisser, esou wier dat neit Bail-à-Loyer-Gesetz zwar virgestallt ginn, ma dat géing sech d'Mieterschutz ASBL vum Gesetzesprojet awer net erwaarden, esou de Fabio Spirinelli. Et wär gutt, dass dat investéiert Kapital méi genee definéiert gëtt an dass et muss am Kontrakt stoen. Och dass de Prozentsaz, fir de Loyer ze berechnen, reduzéiert gëtt, begréisst de Fabio Spirinelli. Dat neit Gesetz gesäit vir, dass de Loyer op 12 Méint net méi héich dierf si wéi 3,5 Prozent vum investéierte Kapital. Aktuell ass et 5 Prozent. Bei manner gutt isoléierte Logementer wier den Taux an Zukunft bei 3 Prozent.

Investéiert Kapital gëtt méi héich reevaluéiert

E Schrëtt an déi richteg Richtung, mee de Rechnungsmodell fir iwwerhaapt emol dat investéiert Kapital bei bestoenden Immobilien ze berechnen, wär kontraproduktiv. De Logementsministère ass am Widdersproch, esou den Invité vun der Redaktioun: mat den neie Koeffiziente kéint ee bei eelere Gebaier eventuell souguer méi héich Loyere froen. Huet een zum Beispill am Joer 2000 kaf, dann ass de Koeffizient mam neie Gesetz 4,13, wärend en aktuell bei 1,4 läit. Forcement gëtt de Capital investi vun där Immobilie bal véiermol méi héich. Hëlt een dovunner 3,5 oder 3 Prozent, esou gëtt de maximale Loyer, deen e Proprietär froe kann, méi héich wéi mam aktuelle Gesetz. Doranner wier de Projet de loi kontradiktoresch, esou de Fabio Spirinelli vum Mieterschutz.

Bei der Co-Locatioun bleiwen Onkloerheeten

Och wat d'Co-Locatioun betrëfft, géing et nach Onkloerheete ginn. Zwar wier et duerch de Projet de loi besser gereegelt, dass ee fir eenzel Zëmmer net méi am Präis dropschloe kann, well och do de gesamte Loyer net iwwert 3,5 oder 3 Prozent vum investéierte Kapital dierf sinn. Ma et wier weider onkloer, wéi Leit, déi an enger Co-Locatioun wunnen, Aidë kënnen ufroen. Gëtt een nämlech als Menage ugesinn, ass d'Limitt vum Revenu séier erreecht. Dräi Erwuessener, déi de Mindestloun verdéngen, géingen zum Beispill scho keng Subvention loyer méi kréien. Allgemeng wär den Text éischter fir de Proprietär adaptéiert ginn, ewéi fir de Locataire, esou nach de Fabio Spirinelli.

De Mieterschutz ass och der Meenung, dass de Seuil misst adaptéiert ginn, fir dass méi Leit eligibel sinn, fir eng Aide ze kréien. Eng Persoun, déi eleng wunnt, kann zum Beispill bis 200 € kréien, dierf dann awer net méi wéi ëm 3.100 € netto verdéngen. Bei engem Loyer plus Chargë vun 1.500 € geet scho quasi d'Hallschent vun der Pai fir de Beräich Logement drop. Et wieren zwar schonn Ännerungen un den Aidë gemaach ginn, ma et géing ee mierken, dass dat net duer geet. De Fabio Spirinelli huet dann nach ugemierkt, dass d'Loyerssubventioun eng Bekämpfung vun engem Symptom ass an net d'Bekämpfung vum Problem un der Wuerzel. Et wier en ze vill groussen Desequiliber um Marché.

Loyer nach bis Enn des Joers agefruer

Wat d'Afréiere vun de Loyeren ugeet, esou sot de Fabio Spirinelli, dass sech net ëmmer géing dru gehale ginn. Et hätte sech awer och scho Locatairë beim Mieterschutz gemellt, well d'Proprietäre schonn ugekënnegt hunn, de Loyer op den 1. Januar 2023 ze erhéijen. Dat wier zwar erlaabt, ma et wier awer nach net gewosst, ob de Gel vun de Loyeren net eventuell nach géing verlängert ginn.

D'Mieterschutz ASBL géing vill consultéiert ginn, et géing och antëscht net méi duergoen, dass d'Associatioun vu Benevolle geréiert gëtt. Spezifesch Servicer, déi zum Beispill am Sträitfall kéinten hëllefen, wieren néideg.

Invité vun der Redaktioun: Fabio Spirinelli

Rendez-vous fir den Interview mam Invité vun der Redaktioun all Dag vu méindes bis freides um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op RTL Play ass d'Emissioun dono och am Replay ze fannen.