En Dënschdeg de Moie war d'Vize-Presidentin vun der COPAS, Doktesch an der Geriatrie an Generaldirektesch vum Zitha-Grupp eis Invitée vun der Redaktioun.

Wéi erwaart klammen d'Corona-Zuelen och an den Altersheemer an et ginn och nees Clusteren. Ma och bei der eelerer Populatioun wieren d'Krankheetsverleef manner grav, well d'Leit geimpft an d'Virusmutatioune manner schlëmm wieren. Dat sot Dr. Carine Federspiel den Dënschdeg de Moien. D‘Vize-Presidentin vun der COPAS, dem Daachverband vun de Prestatairë vun Alters- a Fleegeheemer a Generaldirektesch vum Zitha-Grupp war eis Invitée vun der Redaktioun.

De Constat, datt d'Fleegepersonal mental an emotional erschöpft wier, wier och net nei. Dat hunn nieft der neier Etüd LëtzCare och eng ganz Rei aner Etüden an de leschte Jore gewisen. D'Corona-Kris hätt dëst Phänomen awer nach weider verstäerkt. Do géif probéiert ginn, dem Personal ze hëllefen. Fir dem Personalmanktem am Fleegesecteur entgéintzewierken, wëll ee Sensibiliséierungscampagnë lancéieren, fir den Image vum Beruff ze verbesseren. Donieft wéilt een d‘Leit am Beruff halen an hinnen dofir nei Aarbechtsmodeller proposéieren, déi besser compatibel si mat hirem Privatliewen an och zum Beispill mat neie Carrièresperspektiven. Donieft wier och e participative Management-Stil wichteg, dass all Mënsch kéint matschaffen an decidéieren. Dat géing dem Zäitgeescht gerecht ginn, sou d‘Invitée.

Och Finanziell muss et awer klappen, fir d‘Fleegepersonal am Beruff ze halen.

Zanter Jore wënscht sech d‘COPAS, dass d'Kollektivverträg vum Spidolssecteur an der Fleeg baussent de Spideeler méi no beienee kommen, och fir dass ee bannent den zwee Secteure kéint hin an hier wiesselen. Aktuell ass de Kollektivvertrag vun der FHL, also dem Spidolssecteur, nämlech besser, respektiv et huet ee méi Virdeeler.

"Mir kënnen net verstoen, wéi Beruffer wéi eng Infirmière zwee ënnerschiddlech Verdéngschter an zwee ënnerschiddlech Aarbechtsbedéngungen hunn", sou Dr. Carine Federspiel. Besonnesch well d'Formatioun an d'Responsabilitéit déi nämmlecht wieren.

D'Kritik vun der COPAS gouf et um Tripartite-Accord. Doranner gouf jo festgehalen, datt de Staat d'Méikäschte fir Energie géif iwwerhuelen, wann d'Haiser hir Tariffer dofir net eropsetzen. Ma net nëmmen d'Energiepräisser wiere geklommen, och d'Iessen, de Mobilier an den Transport wiere méi deier ginn. Donieft wier een net frou, datt de Staat sech hei an d'Präispolitik vun der COPAS amëscht. Hei wier nach Klärungsbedarf, seet d'Carine Federspiel vun der COPAS.

Invité vun der Redaktioun: Dr. Carine Federspiel

Rendez-vous fir den Interview mam Invité vun der Redaktioun all Dag vu méindes bis freides um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op RTL Play ass d'Emissioun dono och am Replay ze fannen.