E Freideg de Moien hu mir an der Emissioun "Invité vun der Redaktioun" beschwat, wéi d'Patienteversuergung besser ka geléngen.

De CAPAT, den neie Cercle vun de Patientenassociatiounen, dee virun engem Mount gegrënnt gouf, kéint e Facilitateur tëscht den Autoritéiten an de Patiente ginn. Dat sot d'Presidentin vum CAPAT, d'Shirley Feider, e Freideg de Moien hei op RTL. Si war eis Invitée vun der Redaktioun.

Néng Associatiounen, déi Patiente mat Pathologië wéi Diabetis, Kriibs oder enger rarer Krankheet vertrieden, hu sech an deem Verbond zesumme geschloss. Eng Konkurrenz zur Patientevertriedung wëll de CAPAT iwwerdeems net sinn. D'Presidentin Shirley Feider huet betount, dass ee komplementar wëll schaffen. De CAPAT hätt jo och eng ganz spezifesch Zilgrupp.

Eng Behandlung op Aenhéicht

Als ee vun de Schwéierpunkten huet d'Shirley Feider och de Patient-Partenaire genannt. Dobäi geet et dorëms, dass Patienten, déi Laangzäit an enger Behandlung sinn, Informatiounen ewéi och hir Erfarung mat de Professionelle vun der Santé kënnen deelen.

Och wat d'Schwieregkeeten ugeet, mat deene Patiente kënne confrontéiert sinn, wier et méi einfach zesummen ze schaffen. Dat wier eng Win-Win-Situatioun, esou d'Shirley Feider. Well de Santésministère esou och nëmmen eng Ufro kritt, an déi verschidde Patientenassociatiounen duerch hir Zesummenaarbecht besser representéiert wieren.

Et wéilt een och gäre mat um Gesondheetsdësch vertruede sinn, fir sech mat de Professionelle kënnen auszetauschen. De Patient sollt net nëmmen zum Schluss vun den Diskussiounsronnen zu Wuert kommen, mee am beschten direkt vun Ufank u mat agebonne ginn.

Och bei politeschen Decisioune sollen d'Patiente via de CAPAT kënne vertruede sinn.

De CAPAT ass nach an de Kannerschong

Bis Enn vum Joer géing et mol drëm goen ze informéieren an en Internetsite opzestellen. Aktuell kann een de Cercle just per Mail erreechen, iwwert contact@capat.lu. Am éischte Joer wéilt een och dorunner schaffen, déi néideg Donnéeën ze sammelen, fir ze wëssen, wéi vill Patientenassociatiounen et iwwerhaapt gëtt a wéi eng nach aktiv sinn. Der Shirley Feider no wieren et der op d'mannst 40.

Den Austausch tëscht den Organisatiounen, déi sech ëm Patiente mat enger spezifescher Pathologie këmmeren, wier immens wichteg. Zesummen hätt een der Politik géintiwwer nämlech méi Gewiicht.

Et hätt een och scho gemierkt, dass et allgemeng méi einfach ass, fir eng gemeinsam Ufro ze stellen. D'Shirley Feider huet hei d'Beispill vun den FFP2-Maske genannt. Well et d'CAPAT am Ufank vun der Pandemie nach net gouf, hate vereenzelt Associatiounen zesummen eng Ufro beim Gesondheetsministère gemaach, wat ganz gutt geklappt hätt. Esou ass och d'Iddi vun engem Verbond entstanen.

Invité vun der Redaktioun: Shirley Feider

Rendez-vous fir den Interview mam Invité vun der Redaktioun all Dag vu méindes bis freides um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op RTL Play ass d'Emissioun dono och am Replay ze fannen.