E Mëttwoch de Moie waren ënnert anerem d'Gemengepolice an d'Immigratioun Thema an der Emissioun "Invité vun der Redaktioun".

Den neien Inneminister a Policeminister wëll eng Rei Saache bei der Police änneren: Eng nei Unitéit – déi lokal Police – soll agefouert ginn, de Rekrutement soll méi séier goen, a wann ee méi spezifesch interesséiert ass, zum Beispill un der Drogen- oder der Finanzpolice oder eben der Gemengepolice, soll dat och méiglech sinn. Den neien CSV-Minister Léon Gloden war e Mëttwoch de Moien eisen Invité vun der Redaktioun.

De leschten Detail iwwer déi geplangte "lokal Police" steet nach net. Och net, wat den Timing oder de Finanzement ugeet. Dat géif am Dialog diskutéiert ginn. Mä déi lokal Police soll dem Buergermeeschter ënnerstoen. Déi lokal Beamte sollen déi selwecht Rechter, Flichten, Pai a Karriärsméiglechkeeten hunn. A besonnesch solle si preventiv schaffen.

E richtege Platzverweis soll dann och kommen. Haut hu mer e Platzverweis, deen näischt bréngt, seet de Léon Gloden. D’Beamten hätte keng kloer Instruktiounen, wéissten net, wat se dierften. Hie wéilt e strikte Platzverweis, wou d’Police Leit kann ewechhuelen, déi déi ëffentlech Uerdnung stéieren. Zum Beispill se sech viru Fënstere breet maachen a fir en Onsécherheetsgefill suergen.

De Minister Gloden ass och zoustänneg fir d'Immigratioun. Hie wéilt méi eng "verantwortungsvoll" Immigratiounspolitik. Leit, déi dierfte bleiwen, missten och integréiert ginn. A Persounen ouni Perspektiven, fir am Grand-Duché ze bleiwen, misste méi séier an hir Heemechtslänner zréckgeschéckt ginn. Dofir bräicht een awer europäesch Léisungen.

Invité vun der Redaktioun - Léon Gloden

Rendez-vous fir den Interview mam Invité vun der Redaktioun all Dag vu méindes bis freides um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op RTL Play ass d'Emissioun dono och am Replay ze fannen.