E Mëttwoch de Moie sinn d'Patienteversuergung an de CAPAT Thema an der Emissioun "Invité vun der Redaktioun".

De Patient soll eng méi eng aktiv Roll spillen, wann et ëm seng Gesondheet geet. Dofir gouf d‘Konzept vum "Patient-Partenaire" entwéckelt. Dat sot d'Shirley Feider e Mëttwoch de Moien. D‘Presidentin vum CAPAT, dem Cercle vun de Patienten-Associatiounen, war eis Invitée vun der Redaktioun.

Invité vun der Redaktioun

De Patient hätt eng Expertise, wat säin Alldag, säi Liewensstil a seng gesondheetlech Geschicht ugeet. Dat, kombinéiert mam Fachwësse vum Dokter, géing et erlaben, eng besser Gesondheetsversuergung ze garantéieren oder am Fall vun enger chronescher Krankheet eng besser Liewensqualitéit. Wann ee sech als Patient och méi wéilt investéieren, géing een sech och méi valoriséiert a motivéiert spieren.

Et géife schonn e Rei Initiativen, fir méi Patiente-Participatioun ginn, mee dat misst awer institutionaliséiert ginn, also méi "normal" ginn. Am Ausland géingen et vill Modeller ginn a vereinfacht wieren dës och zu Lëtzebuerg applikabel.

Eng Professionaliséierung ass néideg

De CAPAT gëtt et zanter engem Joer. 13 Patienten-Associatioune wiere mëttlerweil scho Member. De CAPAT ass do, fir hinne bei hiren Defien ze hëllefen, ze informéieren an ze sensibiliséieren. Enn des Joers hätt de CAPAT elo och eng ëmfaassend Enquête gestart. D‘Zil dovunner wier et, een nationale Regëster vun all de Patienten-Associatiounen op d‘Been ze stellen.

Da géing et och drëm goe fir erauszefannen, mat wéi engen Defien si am Alldag ze dinn hu punkto Accès, Logistik an d‘Qualitéit vun de Soinen. Donieft géing et och drëm goen, erauszefannen, wou d‘Stëmm vum Patient an den Associatiounen ass. Den Ament géif och just benevole geschafft ginn. Eng Professionaliséierung wier awer néideg, fir kënne méi effikass ze sinn, sou d'Shirley Feider.

Wënsch un déi nei Regierung

Huet sech d‘Gesondheetsversuergung fir de Patient am leschte Joer verbessert? Dat kéint een elo nach net soen, et wier nach ze fréi, sou d‘Invitée. An Zukunft soll een zum Beispill no engem Parcours de soins säi Feedback kënne ginn als Patient.

Et wier een och frou, dass een als CAPAT mat agebonne gouf am Observatoire de la Santé. Fir d‘Zukunft géing si sech awer nach wënsche, dass d‘Konzept vum Patient-Partenaire keng Mode-Erscheinung bleift, mee och wierklech um Terrain ëmgesat gëtt, fir dass de Patient iwwerall seng Plaz fënnt, sou d‘Presidentin vum CAPAT, dem Cercle vun de Patienten-Associatiounen.

En Donneschdeg ass iwwerdeems den nationalen Dag vum "Patient-Partenaire" organiséiert vun der Spidolsfederatioun.

Rendez-vous fir den Interview mam Invité vun der Redaktioun all Dag vu méindes bis freides um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op RTL Play ass d'Emissioun dono och am Replay ze fannen.