Et ass déi zweete Kéier an der Geschicht vun der moderner Formel 1, datt samschdes kee Qualifying, mä e Sprint gefuer gëtt.

Dofir war schonn e Freideg d'Qualifikatioun zu Monza. Hei konnt sech de Valtteri Bottas duerchsetzen, dat viru sengem Teamkolleeg Lewis Hamilton, dem Max Verstappen an dem Lando Norris.

Ervirzehiewen ass och d'Resultat vum Antonio Giovinazzi, deen et eng zweete Kéier hannertenee fäerdeg bruecht huet, mam Alfa Romeo an de Q3 ze kommen. Hei ass awer just déi 10. Plaz erausgesprongen.

Bottas muss bei Course vu leschter Plaz starten

Am Sprint e Samschdeg geet et souwuel ëm 3, respektiv 2 an 1 Punkt, fir Klassement, ma och ëm d'Startopstellung fir d'Course e Sonndeg. Ma wéinst enger Strof wäert de Valtteri Bottas, egal wou hie sech e Samschdeg am Sprint wäert klasséieren, an der Course vun der leschter Plaz aus starten. Grond dofir ass en neie Motor, deen de finnesche Mercedes-Pilot virum Qualifying agesat krut. Seng Startplaz beim Sprint ass awer net a Gefor.

De Sprint iwwer 100 Kilometer e Samschdeg, wéi och de grousse Präis vun Italien e Sonndeg kënnt Dir wéi gewinnt op RTL ZWEE, op RTL.lu an op RTL Play kucken.