De Lewis Hamilton ass déi séiersten Zäit gefuer, ma gëtt wéinst enger Motorstrof 10 Plazen no hanneversat a start domadder vun der 11. Plaz.

Um Samschdeg stoung zu Istanbul de Qualifying vum Grousse Präis vun der Tierkei um Programm. Dës Statioun gouf iwwregens just mat an de Course-Kalenner geholl, well de Grousse Präis vu Japan annuléiert gouf. Am Mëttelpunkt stoung wéi sou dacks an dëser Saison den Zweekampf tëscht dem Weltmeeschter Lewis Hamilton op Mercedes a sengem Kontrahent Max Verstappen op Red Bull. Am Generalklassement steet de Britt aktuell mat 2 Punkten Avance un der Spëtzt, ma bei nach 7 verbleiwende Coursë bleift et weiderhi ganz spannend.

Am Q1 gouf et eng ganz positiv Iwwerraschung fir Haas mam Mick Schumacher, deen et als 14. fir déi 2. Kéier an de Q2 gepackt huet. Fir den Daniel Ricciardo um McLaren sollt et iwwerdeems net duergoen a sou ass hien ewell am Q1 ausgescheet.

Am Q2 huet sech de Sebatian Vettel iwwerdeems misse geschloe ginn, wärend säi Coequipier vun Aston Martin de Lance Stroll d'Qualifikatioun fir de Q3 realiséiere konnt.

Um Enn war d'Victoire am Qualifying fir den Hamilton, ma hie wäert als 11. an d'Course goe mussen, dëst well Mercedes Deeler vum Motor gewiesselt huet an hie soumat 10 Plazen zréckgesat gëtt. Domadder steet de Valtteri Bottas, deen déi zweetséiersten Zäit hat, um Sonndeg op der Pole Position. Als Zweete wäert de Max Verstappen an d'Course goen an op Plaz dräi wäert de Pierre Gasly stoen.

D'Course vum GP vun der Tierkei gëtt e Sonndeg um 14 Auer gestart. Mir si vun 13.20 Auer live dobäi, dëst kënnt Dir op RTL ZWEE, op RTL.lu an um RTL Play live suivéieren.