Hannert dem Italiener kënnt de Joan Mir als 2. an de Jack Miller als 3. an d'Zil. An der Moto3 ass iwwerdeems de Pedro Acosta op KTM neie Weltmeeschter

De Grousse Präis vun der Algarve ass 2 Ronne viru Schluss ofgebrach ginn, dat no enger Chute vun deenen zwee KTM-Fuerer Oliveira a Lecuona. Am Autódromo Internacional do Algarve war deemno de Francesco Bagnaia dee séiersten. An der zweetleschter Course vun der Saison ass hie vun der Pole an d'Course gaangen an huet souverän gewonnen. De Joan Mir war beim Ofbrieche vun der Course op der 2. Plaz, de Jack Miller gëtt den 3.

Den Alex Marquez huet no engem gudde Qualifying e Samschdeg och um Sonndeg eng super Leeschtung gewisen, verpasst de Sprong awer op de Podium a klasséiert sech als 4. Den aktuelle Weltmeeschter Fabio Quartararo, deen als 7. an d'Course gaangen ass, ass no enger Chute 5 Ronne viru Schluss net an d'Zil komm.

An der Moto2 gouf et um Sonndeg nach keng Decisioun an der Weltmeeschterschaft. Hei fält d'Entscheedung an der leschter Course. Gewonnen huet an der Algarve de Remy Gardner virum Raul Fernandez an dem Sam Lowes.

An der Moto3 ass de 17 Joer ale Pedro Acosta vun der 14. Plaz op déi éischte gefuer a kréint sech mat dëser Victoire zum neie Weltmeeschter an der Moto3. Kuerz viru Schluss huet de Dennis Foggia wéi de Gewënner ausgesinn, ass awer an der leschter Ronn wéi och de Sergio Garcia an eng Chute verwéckelt ginn.

Klickt hei, fir de Replay vun de Courssen op RTL Play ze kucken.

D'Resultater vun de Courssen

MotoGP
1. Francesco Bagnaia (Ducati)
2. Joan Mir (Suzuki)
3. Jack Miller (Ducati)

Moto2
1. Remy Gardner (Kalex)
2. Raul Fernandez (Kalex)
3. Sam Lowes (Kalex)

Moto3
1. Pedro Acosta (KTM)
2. Andrea Migno (Honda)
3. Niccolo Antonelli (KTM)

De General

MotoGP
1. Fabio Quartararo 267 (Yamaha)
2. Francesco Bagnaia 227 (Ducati)
3. Joan Mir 195 (Suzuki)

Moto2
1. Remy Gardner 305 (Kalex)
2. Raul Fernandez 282 (Kalex)
3. Marco Bezzecchi 214 (Kalex)

Moto3
1. Pedro Acosta 259 (KTM)
2. Dennis Foggia 213 (Honda)
3. Sergio Garcia 168 (GASGAS)