Obwuel de Lëtzebuerger Motorradpilot de prestigiéise Bol d'Or gewanne konnt, huet hien et nach net an den Elittekader vum COSL gepackt.

COSL iwwer Krittäre fir Motorradsportler

De Chris Leesch ass aktuell deen eenzege Motorradpilot aus dem Grand-Duché, deen op professionellem Niveau a sengem Sport ënnerwee ass. Zejoert huet de 27 Joer ale Lëtzebuerger d'Konschtstéck fäerdegbruecht, de Bol d'Or a senger Kategorie, dem Superstock, ze gewannen. Dat Joer virdru war et och schonn eng zweete Plaz fir hie bei der prestigiéister Laangstreckecourse op der Welt. An de leschte Jore sinn d'Resultater vum Chris Leesch am Superbike ëmmer besser ginn, et ass awer bis elo nach net duergaangen, fir an e Kader vum Lëtzebuerger Comité Olympique ze kommen. De Franky Hippert huet beim Pilot nogefrot, firwat dat esou ass.

Et ass schonn aussergewéinlech, datt e Lëtzebuerger op esou engem héijen Niveau am Motorradssport fiert. Och wann de Superbike net déi nämmlecht Popularitéit beim Grand-Public huet, wéi elo zum Beispill MotoGP, esou sinn déi Piloten awer och richteg séier ënnerwee a mussen hir Rakéiten op zwee Rieder perfekt am Grëff hunn. D'Victoire am Bol d'Or zejoert huet elo schonn e puer Diere fir de Chris Leesch opgemaach an d'Relatioune mat Honda gestäerkt. Hie fiert och elo d'nächst Saison de franséische Superbike-Championnat.

De Chris Leesch ass bis elo nach net an engem Kader vum COSL. Et ass een do awer an engem Austausch tëscht der Motorradsfederatioun an dem Comité Olympique. Déi Diskussioune lafen elo zanter enger Zäitchen an de Chris Leesch hofft, datt een eng Kéier op e gemeinsame Nenner kënnt.

Wat elo d'Fro ugeet, firwat den 27 Joer ale Lëtzebuerger nach net an engem COSL-Kader ass, ginn et an enger éischter Phas zwou Saachen ze soen, seet den Directeur Technique vum Comite Olympique Raymond Conzemius, an zwar, datt de spuenesche Championnat nach net duergeet an och net dem Krittär entsprécht dee si hunn fir den Elite-Kader, an fir de Bol d'Or feelt de Krittär. Do ass een och ofhängeg vun der Expertis vum Verband. De Wee fir an en COSL-Kader ze kommen, ass deen iwwert d'Krittären. Déi Krittäre ginn an der Reegel opgestallt duerch d'Propose vun der Federatioun an Zesummenaarbecht mam Expert vum COSL. Dann gëtt mam Bureau technique a mat der Direction technique doriwwer diskutéiert, fir doriwwer dann dee Krittär festzehalen.

Donieft gëtt et awer och nach d'Méiglechkeet, datt d'Sportler Projeten erareechen, an deenen si opzeechnen, wou si sech wëllen hin entwéckelen, fir iwwert dee Wee eng eventuell Ënnerstëtzung ze kréien, zum Beispill an deem s een dann op de Lihps, zeréckgräife kann.