E Sonndeg konnt de Sébastien Ogier och um 4. an domat leschten Dag seng Féierung verdeedegen.

Den Toyota-Pilot gewënnt domat d’Rallye Monte-Carlo fir déi 9. Kéier, woumat hien en neie Rekord opstellt.

No de Specialle 15 bis 18, déi e Sonndeg nach gefuer gi sinn, hat de Fransous um Enn eng Avance vun 18,8 Sekonnen op säi finnesche Coequipier, de Kalle Rovanperä. De Belsch Thierry Neuville (Hyundai i20) kënnt am General iwwerdeems op déi 3. Plaz, dat mat engem Retard vu 44,6 Sekonnen op den Ogier.

De Lëtzebuerger Grégoire Munster huetop sengem Ford Fiesta vun M-Sport seng 17. Plaz vum Samschdeg am General verdeedegt. A senger Klass (RC2) ass hie mat engem Retard vu 4:49,5 Minutten de 9. ginn, am General hat hien ee Retard vu 14:52,9 Minutten op den Ogier. An der WRC2-Kategorie war et um Enn déi 8. Plaz.

Zäitstrof kascht Gryazin d'Victoire

D'Victoire an der WRC2 war iwwerdeems fir den Nikolay Gryazin (Fabia RS Rally2), dat allerdéngs net fir laang. Mat engem Visrprong vu 4,5 Sekonnen op de Fransous Yohan Rossel (Citroën C3 Rally2) konnt hie sech zwar duerchsetzen, ma nom Rallye gouf et nach e Protest, wouduerch de Gryazinnodréiglech eng Zäitstrof vu 5 Sekonne krut, well e soll ofgekierzt hunn an enger Kéier. Domat verléiert hien d'Victoire an der WRC2 an déi geet dann un de Fransous Rossel.

Op déi 3. Plaz an der WRC2 ass de Pepe Lopez mat engem Retard vu ronn 1 Minutt an 10 Sekonne komm.