Basket Esch konnt sech e Samschdeg schonn 92:76 géint den T71 Diddeleng behaapten. D'Bartrenger Dammen hunn näischt géint den Telstar ubrenne gelooss.

An der ieweschter Divisioun am nationale Basket ware bei den Hären e Sonndeg zwou Partien. Wärend e Samschdeg all d'Aen an d'Forge du Sud op de Match tëscht dem T71 an dem Basket Esch geriicht waren, war an der Fiels den ABC op Besuch. De Stater Racing krut et iwwerdeems am fréien Owend mat de Pikes ze dinn. Och bei den Damme gouf e Samschdeg Basket gespillt.

Häre-Basket

Etzella – Amicale 98:89 (54:42)

Déi Ettelbrécker wollten an der eegene Hal hir Plaz am ieweschten Drëttel an der Tabell vun der Total League um Sonndeg festegen. D'Etzella hat awer d'Amicale vu Steesel op Besuch, et huet deemno eng schwéier Aufgab op Gutenkauf a Co. gewaart.

Et war awer d'Ekipp aus dem Däich, déi an der Ufanksphas vun der Partie Iwwerwaasser hat. Si konnt sech nämlech eng tëschenzäitlech Avance vu 17 Punkten erausspillen, ier eng Reaktioun vun de Steeseler koum. Ënnert dem Impuls vum Speelman huet d'Amicale gekämpft, ass awer ëmmer nees u sech well gescheitert: d'Punkte wollten einfach net falen. Dovun huet Ettelbréck profitéiert an ass mat engem 54:42 an d'Paus gaangen.

D'Amicale huet sech och an der 2. Hallschecht nach net opginn an huet ee gudden 3. Véierel gespillt. Duerno koumen déi Steeseler awer nees an de Lach an hu quasi guer net méi getraff. Dovunner huet, wéi schonn am 1. Duerchgang, d'Etzella profitéiert an d'Gäscht esou op Distanz gehalen. Um Enn huet Steesel missen eng Defaite am Däich astiechen, och wann d'Amicale däitlech besser gespillt huet wéi an der leschte Match.

© Shari Schenten

Sparta – Hiefenech 93:76 (46:36)

An der 2. Sonndespartie am ieweschten nationale Basketball war den Opsteiger Hiefenech bei der Sparta zu Bartreng op Besuch. D'Lokalekipp huet vun Ufank un den Tempo virginn a konnt sech esou een agreabele Virsprong erausspillen – 23:18 no den éischten 10 Minutten. Dat nämmlecht Resultat gouf et am 2. Quarter an esou stoung et 46:36 an der Paus.

Och an der 2. Hallschecht huet d'Sparta näischt ubrenne gelooss an Hiefenech weider dominéiert. Hiefenech koum no engem 16-Punkte-Retard zwar nees op 58:53 zeréck, ma ënnert dem Impuls vun engem staarke Pit Koster hunn déi Bartrenger awer geäntwert. No de 4 Véierel stoung eng verdéngten a wichteg Victoire fir d'Lokalekipp um Tableau.

T71 Diddeleng - Basket Esch 76:92 (28:40)

De Basket Esch bleift weiderhin ongeschloen
E Samschdeg den Owend hat den T71 géint staark Escher näischt ze gutt.

An deenen éischte Minutten hu béid Ekippe gudden a schnelle Basket gewisen. No 3 Minutte stoung et 9:7 fir Diddeleng. Eng ganz intensiv a serréiert Partie gouf de Spectateuren an der Ufanksphas gebueden. No 5 Minutte war den Tom Schumacher schonns mat 2 perséinleche Feeler belaascht, soudass hie vum Trainer ausgewiesselt ginn ass. Vun deem Ament un huet Esch e 16:4-Laf realiséiert. 26:21 stoung et fir déi Escher no 10 Minutten.

© Christophe Hochard

Och wann de Schumacher am 2. Véierel nees um Terrain stoung, ass bei den Diddelenger net méi all ze vill zesumme gelaf. An der Offensiv hu si hier Wërf net méi getraff an och an der Verdeedegung ware si net méi sou aggressiv. Déi Escher hu par Konter ee Fast Break nom aneren eragesat. No 20 Minutte haten déi Escher en Avantage vu 40:28.

© Christophe Hochard

Och am 3. Véierel war et den Tabelleleader vun Esch, dee ganz dominant opgetrueden ass. Aus engem staarke Kollektiv eraus hu si vir hir Punkte markéiert an hannen net vill zougelooss. Diddeleng huet et wuel probéiert an ass och bis op 12 Punkten nees erukomm. Ma zum Schluss vum 3. Véierel war et den Jackson-Cartwright, deen den Escher Tempo nees ugezunn huet, soudass den ongeschloene Leader mat 70:53 an de leschte Quarter gaangen ass.

Am leschte Véierel huet Esch näischt méi ubrenne gelooss a gewënnt dëse Match verdéngt mat 92:76 géint den T71 Diddeleng. Esch bleift domat ongeschloen op der Tabelleplaz 1.

Arantia Fiels - AB Konter 98:91 (54:42)

Déi Fielsser hu Konter geklappt
D'Arantia konnt sech e Samschdeg den Owend géint den ABC behaapten.

D'Fiels hat de besseren Depart an huet an den Ufanksminutte virum allem den defensive Rebound dominéiert. Sou stoung et dann och no knapps 3 Minutten 10:4 fir d'Lokalekipp. D'Arantia, déi e ganz schnelle Basket an deenen éischten 10 Minutte gewisen huet, ass ëmmer erëm ënnert de Kuerf gezunn a huet sou einfach Punkte markéiert. Vu Konter ass an der Defense ze wéineg Géigewier komm. Mat 26:21 fir d'Arantia gouf den éischte Véierel ofgeschloss.

© Guy Seyler

Een ähnlecht Bild huet sech och am 2. Quarter gewisen. Béid Amerikaner vun der Fiels hu ganz gutt mateneen harmonéiert, op Konter Säit war dat net de Fall. Si sinn einfach net eens gi mat dem schnelle Basket vun der Heemekipp. D'Fiels ass deemno mat enger verdéngter 12 Punkte Féierung mat 54:42 a d'Vestiairë gaangen.

D'Gäscht vu Konter hunn am 3. Véierel d'Verdeedegung op eng Zon ëmgestallt, ma och dat huet net déi néideg Reussite bruecht. D'Fiels huet weider den Toun an eegener Hal uginn. De Virsprong louch konstant bei ëm déi 10 Punkten. Um Enn vum drëtte Véierel ass de Virsprong dunn an d'Luucht gaangen. 76:61 fir d'Arantia no 3 Véierel.

© Guy Seyler

Ufank vum 4. Véierel huet Konter ënnert dem Impuls vum Birenbaum an dem Hittelet e 17:7 geschoss. D'Gäscht sinn duerch dëse Laf wuel nach eng Kéier op 5 Punkten erukomm, ma d'Ekipp ronderëm den Andjelkovic ass ze spéit an dësem Match erwächt. D'Arantia Fiels klappt den AB Konter mat 98:91.

Racing - Musel Pikes 70:65 (38:30)

D'Musel Pikes hu besser an de Match fonnt a louchen no 2 Minutte mat 6:0 vir. An der Suite hunn d'Haushäre besser an de Match fonnt. Ënnert dem Impuls vum Laures, dee souwuel an der Offensiv wéi och an der Defensiv senger Ekipp d'Rebounder geséchert huet, ass dem Racing ee 12:0-Laf gelongen. Den éischte Véierel huet de Stater Racing mat 19:15 fir sech entscheet.

Am 2. Quarter waren et op Säite vun der Pikes virun allem de Jeffrey Lee Garret a de Joe Calmes, déi d'Spill u sech gezunn hunn. Ma allen zwee hunn trotz ville fräie Schëss souwuel vun der Fräiiworflinn, wéi och aus dem Feld ze vill Schëss dernieft gesat, soudass de Retard aus dem 1. Véierel ni wielech méi kleng ginn ass. De Racing huet konzentréiert weider gespillt a konnt seng Féierung souguer ausbauen. No 20 Minutte stoung et deemno 38:30 fir d'Lokalekipp.

Nom Téi hunn d'Pikes ënnert dem Impuls vum Garret, dee ganzer 11 Punkten am 3. Quarter geschoss huet, besser gespillt, soudass si de Réckstand virum de leschten 10 Minutte op 2 Punkte verkierze konnten. Aus der Siicht vun de Pikes stoung et virum leschte Véierel 49:51.

Damme-Basket

Etzella Ettelbréck - Amicale Steesel 99:91 (87:87)

E Sonndeg konnten déi Ettelbrécker Damme mat 99:91 géint d'Amicale gewannen. D'Partie war beim Stand vu 87:87 an d'Verlängerung gaangen.

Sparta - Telstar 79:63 (38:44)

An där anerer Sonndespartie am Damme-Basket waren d'Hesper Dammen zu Bartreng op Besuch. Hei huet Sparta deen 1. Véierel dominéiert a konnt dëse mat 24:18 fir sech entscheeden. Den Telstar koum awer fulminant mat engem 26:14 an 2. Quarter zeréck an esou goung et mat engem 44:38 fir d'Gäscht op den Téi.

De bessere Start an den 3. Véierel huet iwwerdeems Bartreng fäerdegbruecht. No engem 24:11 am 3. an engem 17:8 am leschte Quarter stoung um Enn eng däitlech Victoire fir d'Lokalekipp um Tableau.

Résidence Walfer - AB Konter 74:78 (42:42)

Walfer huet virun eegenem Public net gutt an de Match fonnt a sou hu si missen den 1. Véierel mat 17:22 ofginn. An deenen zweeten 10 Minutten ass et du besser gerullt, ma Konter huet versicht dogéint ze halen. Mat 42:42 ass et an d'Paus gaangen.

No der Paus waren et Damme vu Walfer, déi weider besser drop waren. 18:13 hu si déi drëtt 10 Minutte fir sech entscheet. Deemno ass et mat 60:55 an de leschte Véierel gaangen. An do war et den ABC, deen op de Gas gedréckt huet an d'Partie um Enn fir sech entscheede konnt.

T71 Diddeleng - Basket Esch 56:53 (29:28)

Victoire fir déi Diddelenger Damme géint Esch
Op an of goung et an der Partie tëscht Diddeleng an Esch - mat dem bessere Schluss fir den T71.

Zu Diddeleng hunn d'Spectateuren eng ganz ausgeglache Partie gebuede kritt. Am 1. Véierel war et wuel de Basket Esch, dee liicht iwwerleeë war, am 2. Quarter waren et dunn awer déi Diddelenger. D'Lokalekipp ass mat engem knappen 1-Punkt-Virsprong an d' Paus gaangen: 29:28 fir den T71. Och nom Téi war et weider enk, ma um Enn sollt sech awer d'Ekipp aus der Forge du Sud behaapten.

Gréngewald - Musel Pikes 51:64 (28:35)

D'Gäscht vun der Musel hunn deen éischte Véierel dominéiert a sou stoung et no 10 Minutte 27:18 fir d'Visiteuren. Am zweete Véierel ass bei béiden Ekippen an der Offensiv net vill zesumme gelaf, soudass déi zweet 10 Minutte mat 10:8 op en Enn gaange sinn. An der Paus stoung et deemno 28:35 aus der Siicht vun der Lokalekipp.

Den 3. Véierel huet den Damme vum Gréngewald gehéiert. Sou si si nach mat just 3 Punkte Retard an de leschte Véierel gaangen. No 30. Minutte stoung et 48:45 fir d'Pikes. An och duerno waren d'Miseler méi staark an hu sech um Enn däitlech duerchgesat.

Den Iwwerbléck vun der Nationale II