Zu Munneref ass en Donneschdeg den Owend d'Awards Night vun der sportspress. 13 Häre sinn nominéiert, 9 Dammen, 5 Ekippen a 5 Traineren.

Am Casino 2000 zu Munneref huet sech bei der Wiel vun der beschter Sportlerin vum Joer d'Christine Majerus virum Jenny Warling an dem Ni Xia Lian duerchgesat. Bei den Häre krut de Bob Bertemes d'Trophée vum beschte Sportler vum Joer iwwerreecht.

Den F91 Diddeleng gouf als bescht Ekipp vum Joer ausgezeechent.

De Luc Holtz konnt sech iwwert de Präis vum beschten Trainer vum Joer freeën.

De Livestream (produzéiert vun apartTV) vun der Sportlergala 2019 fannt Dir hei am Artikel vun 19.15 Auer un.

Virschau op d'Awards Night 2019

Am Casino 2000 zu Munneref gëtt beim Sportler vum Joer de Successeur vum Bob Jungels gesicht a bei den Dammen geet et ëm d'Successioun vum Christine Majerus.

Virschau Sportlergala 2019 / Reportage Rich Simon

Béid Sportler sinn awer och dëst Joer nees selektionéiert a kënnen deemno hir eege Successioun untrieden. Déi zwee zielen och sécherlech nees zum Favorittekrees. D'Konkurrenz ass dëst Joer awer villäicht méi grouss, wéi dat nach dat leschte Joer de Fall war. Bei den Dammen dierft d'Konkurrenz virun allem vun der Karate-Europameeschterin Jenny Warling kommen. Bei den Häre kéint et sinn, datt de Bommstousser Bob Bertemes et op d'mannst emol bis op de Podium géif packen.

Da gëtt awer och nach de beschten Trainer 2019 gesicht. Hei si 5 Männer an der Course. Ënnert anerem den Dan Lorang, dee mat sengen Athlete souwuel bei den Damme wéi och bei den Hären den Triathlon op Hawaii konnt gewannen.

Bei den Ekippe sinn der 5 an der Wiel. Hei dierft et ee Match tëscht dem F91 Diddeleng an der Futtball-National-Ekipp ginn.

Nominéiert fir Sportler vum Joer

Bertemes Bob, Liichtathletik
Gerson Lars, Futtball
Giannotte Flavio, Fechten
Jungels Bob, Cyclissem
Martins Christopher, Futtball
Nunes Dos Santos Claudio, Judo
Pereira Dylan, Automobilsport
Rychlicki Kamil, Volleyball
Seywert Gilles, Bouschéissen Compound
Sinani Danel, Futtball
Stacchiotti Raphaël, Schwammen
Wagner Nicolas, Dressurreiden
Zachäus Stefan, Triathlon

Nominéiert fir Sportlerin vum Joer

Bettendorf Charlotte, Sprangreiden
De Nutte Sarah, Dëschtennis
Fautsch Lis, Fechten
Majerus Christine, Cyclissem
Meynadier Magaly, Basketball
Meynen Julie, Schwammen
Ni Xia Lian, Dëschtennis
Warling Jenny, Karate
Welter Tina, Handball

Nominéiert fir Ekipp vum Joer

Futtball-Nationalekipp, Hären
F91 Diddeleng, Futtball / Hären
Handball-Nationalekipp, Hären
Tennis-FedCup-Ekipp, Dammen
Dëschtennis-Nationalekipp, Dammen

Nominéiert fir Trainer vum Joer

Basic Kresimir, Etzella Ettelbréck / Hären
Danielsson Tommy, Dëschtennis-Nationalekipp / Dammen
Gulbicki André, Handball Esch / Hären
Holtz Luc, Futtball-Nationalekipp / Hären
Lorang Dan, Triathlon / Jan Frodeno an Anne Haug

Präis fir de beschte jonke Sportler an déi beschte jonk Sportlerin

Curci Alessio, Futtball
Daniëls Eva, Triathlon

Präis Sport an Handicap

ELA Lëtzebuerg

Fair Play-Präis

F91 Diddeleng

Prix d'Honneur sportspress.lu

Grand-Duc Jean