Mat 27:29 zéien d'Red Boys no enger ganz serréierter Partie de Kierzeren an Esch gëtt senger Favoritteroll géint den HBD gerecht.

E Samschdeg den Owend war am Lëtzebuerger Handball-Championnat bei den Hären den Optakt vum 3. Spilldag. Ganz spannend Matcher hunn d'Spectateuren an de jeeweilegen Hale gebuede krut. An allen 3 Matcher war et bis zum Schluss immens spannend. Bei den Damme war et den Optakt an déi nei Saison.

Hären-Handball

HC Bierchem - Red Boys Déifferdeng 29:27

Intensiv Partie an deenen éischten 30 Minutten. Béid Ekippen hu variabelen Handball gewisen a ganz couragéiert gespillt, och wann d'Qualitéit um Ufank vun der Saison nach net déi beschte war. Béid Ekippen hu sech awer näischt geschenkt, sou dass et mat 15:14 fir Bierchem an d'Paus gaangen ass.

Ganz hekteschen Ufank vun der 2. Hallschent. Dee bis dohi beschte Mann um Terrain Ariel Pietrasik huet bei engem 7-Meter de Kapp vum Déifferdenger Golkipp getraff. No enger Diskussioun mat den Onparteiesche krut de Pietrasik, dee bis dohi 7 Goler geschoss huet, déi Rout Kaart. Déi Déifferdenger haten dono eng rëtsch Chancen, e Virsprong sech erauszespillen, mee si hunn déi einfachst Chancen net konnten notzen. 19:20 stoung et no 40 Minutten aus der Siicht vu Bierchem. An enger hektescher Schlussphas konnt kee sech ofsetzen, sou dass et bis zur leschter Sekonn spannend bliwwen ass. Um Enn hat Bierchem déi besser Nerven a wënnt mat 29:27.

HB Dideleng - HB Esch 19:23

Op Diddelenger Säit war de Spiller vun der 1. Hallschent ouni Fro de Golkipp Mika Herrmann. Hien huet an deenen éischten 30 Minutten net manner wéi 14 Parade konnten opweisen. Den HBD krut doduerch am Laf vum Match ëmmer méi Confiance a sou stoung et no enger serréiert éischter Hallschent 12:12-Gläich.

No 37 Minutten huet Diddeleng erëm e puer méi Feeler gemaach, an Esch konnt sech tëschenzäitlech mat 2 Goler ofsetzen. Defensë vu béiden Ekippe stoungen awer weiderhi gutt, sou dass et och an der zweeter Hallschent eng ganz serréiert Partie war. 17:14 stoung et no 40 Minutte fir Esch. D'Gäscht hu lues awer sécher ëmmer méi d'Kontroll iwwert de Match gewonnen a sou hu si hire Virsprong step by step ausgebaut. Um Enn wanne si mat 23:19.

© Serge Olmo

Chev Dikrech - HB Péiteng 18:18

D'Gäscht vu Péiteng si vill besser aus de Startlächer komm a waren no 7 Minutte mat 3:0 vir. Dono krut Dikrech sech awer gefaangen an d'Spectateure kruten een ausgeglachene Match gewisen, bei deem d'Lokalekipp aus engem Réckstand sech e Virsprong vun 2 Goler bis d'Paus erausgespillt hunn. Dobäi kënnt nach, dass de Péitenger Charel Settinger an der 26. Minutt eng Rout Kaart krut. 10:8 stoung et an der Paus fir Dikrech.

Änlecht Bild an deenen zweeten 30 Minutten. Et ass hin an hier gaangen, a keng vu béiden Ekippe konnt sech am Laf vum Match ofsetzen. Dikrech krut et awer ëmmer méi schwéier, dëst well d'Spiller Bogdan Stoean a Cedric Dos Santos jeeweils eng Rout Kart gewise kruten. 18:18 heescht et no 60 Minutten, eng Partie bei där béid Ekippen alles op den Terrain geluecht hunn, wat an hinne stécht, mee e Gewënner sollt et zu Dikrech um Samschdeg net ginn.

Dammen-Handball

Chev Dikrech - HC Standard 40:11

No 4 Minutte stoung et 2:2-Gläich. Dono ass Dikrech ëmmer méi staark ginn, sou dass si een 8:0-Laf op den Terrain gezaubert hunn. Dono war de Match esou gutt wéi entscheet, mat 20:4 fir d'Lokalekipp ass et an d'Paus gaangen. No der Paus war et weiderhin een eesäitege Match. D'Damme vum Chev Dikrech wannen um Samschdeg den Owend kloer mat 40:11.

HB Dideleng - HB Esch 34:9

Ganzer 11 Minutten huet et gedauert éier d'Gäscht vun Esch de Gol fir eng éischte Kéier getraff hunn. Zu dësem Zäitpunkt stoung et schonns 8:0 fir Diddeleng. 16:4 stoung et an der Paus. Diddeleng war och no der Paus déi besser Ekipp an esou gewënnt d'Heemekipp mat 34:9 géint Esch.