Iwwerdeems konnt sech bei den Hären den HB Esch mat 33:23 géint de Standard duerchsetzen.

E Samschdeg den Owend war am Lëtzebuerger Handball-Championnat bei den Hären den 8. Spilldag a bei den Damme stoung de 5. Spilldag um Programm.

Hären-Handball

Red Boys Déifferdeng - HB Péiteng 45:19 (23:11)

D'Red Boys sinn als Tabelleleader an dofir och als klore Favorit an dës Partie gaangen, wat sech och séier um Terrain gewisen huet. D'Féierung vun der Lokalekipp ass ëmmer méi gewuess, ouni dass den HB Péiteng eng Chance hat dogéint ze halen. Mat engem Stand vun 23:11 ass et dann och an d'Paus gaangen.

Wéi erwaart huet sech um Spillverlaf an der zweeter Hallschent net vill geännert. Déifferdeng huet weider Gas ginn a wënnt um Enn méi wéi däitlech mat 45:19.

HC Bierchem - HBC Schëffleng 38:16 (16:8)

HB Esch - HC Standard 33:23 (17:12)

Dammen-Handball

HB Museldall - HB Dideleng 21:21 (8:10)

Souwuel de Museldall wéi och Diddeleng hu kee gudde Start an de Match erwëscht a sou huet d'Lokalekipp méi wéi 10 Minutten op den éischten eegene Gol misse waarden. Mat der Zäit sinn awer op béide Säiten e puer Goler gefall a mat enger 10:8-Féierung fir Diddeleng ass et an d'Paus gaangen.

An der zweeter Hallschent huet de Museldall da besser an de Match fonnt a konnt sou de Spillstand op hir Säit zéien. Diddeleng hat weiderhi Problemer virum géigneresche Gol effektiv genuch ze sinn, krut sech dann zum Schluss hin awer nees gefaangen. Et ass an der Schlussphas also nach eng Kéier richteg spannend ginn, wéi 4 Minutte viru Schluss de Gol zum 19:19-Ausgläich gefall ass. An de leschte Minutte konnt sech da keng vu béiden Ekippe méi en Avantage erausspillen a sou bleift et bei engem 21:21-Remis.

Kee Gewënner tëscht Museldall an Diddeleng
An engem enke Match konnt sech schlussendlech keen duerchsetzen a béid Ekippen trennen sech mat 21:21.

HB Käerjeng - HC Standard 25:10 (12:2)

Chev Dikrech - HB Beetebeuerg 57:13 (32:5)

HB Esch - Red Boys Déifferdeng 19:29 (6:13)