No der Lännermatch-Paus war e Samschdeg d'Reprise an der däitscher Futtball-Bundesliga.

Ugefaange mat 5 Matcher e Samschdeg de Mëtteg, wou Bremen iwwerraschend e Punkt zu München krut an Augsburg zu Gladbach an Ënnerzuel 1:1 gläichgespillt huet.

Am Duell tëscht den Noperen Hoffenheim a Stuttgart gouf et kee Gewënner, dofir awer vill Goler; a Schalke ass no enger weiderer Néierlag déif an der Kris. Leverkusen huet eng 1:0-Féierung zu Bielefeld kuriéis duerch e Feeler vum Kipper Hradecky aus der Hand ginn, konnt d'Partie um Enn awer nach gewannen.

Déi éischt Owespartie goung mat engem Gläichspill op en Enn, Leipzig konnt deemno net vum Ausrutscher vu Bayern profitéieren.

Dortmund konnt am 2. Match vum Owend no de Punnktverloschter vun der direkter Konkurrenz dunn d'Chance awer notzen, fir Punkte guttzemaachen.

8. Spilldag vun der Futtball-Bundesliga

Hertha - Dortmund 2:5
1:1, 2:4 Cunha (33', 79'), 1:1, 1:2, 1:3, 2:5 Haaland (47', 49', 62', 79'), 1:4 Guerreiro (70')

Géint eng staark Ofwier vun der Hertha hat Schwaarzgiel am 1. Duerchgang en immens schwéiere Stand. Berlin konnt mat engem Schoss aus 20 Meter vum Cunha an den Avantage kommen.

An den zweete 45 Minutten huet de BVB e Gank eropgeschalt. Et konnt ee virun allem dem Haaland Merci soen, him ass an e bësse méi wéi enger Véierelsstonn en Hattrick gelongen. 20 Minutte virun Enn huet de Guerreiro fir de 4:1 gesuergt an d'Partie war entscheet. Hertha koum op Eelefter nach emol zréck, mä den norwegesche Goalgetter huet 10 Minutte viru Schluss säi 4. Gol markéiert.

Frankfurt - Leipzig 1:1
1:0 Barkok (43'), 1:1 Poulsen (57')

Leipzig huet vun Ufank u versicht, der Partie de Stempel opzedrécken, dat mat gewinnt gudde Ballzirkulatiounen. Frankfurt goung kuerz virun der Paus a Féierung - iwwerraschend, well Leipzig dach déi besser Ekipp bis dohi war.

D'Bullen hu sech virun allem un enger zolitter Ofwier vun der Eintracht d'Zänn ausgebass, ma virun der Stonn huet de Poulsen awer fir den 1:1-Ausgläich gesuergt. Am weidere Verlaf konnt keng Ekipp e richtegen Coup no vir setzen, soudatt et du verdéngt bei engem Gläichspill blouf.

© AFP

Bayern - Bremen 1:1
0:1 Eggestein (45'), 1:1 Coman (62')

Den däitsche Rekordmeeschter ass favoriséiert an d'Partie géint Bremen gaangen an esou hunn d'Münchener och offensiv opgespillt. Bremen huet sech donieft op eng zolidd Defense konzentréiert a keng gréisser Golgeleeënheete vun der Lokalekipp zougelooss.

Kuerz virun der Paus sinn d'Gäscht dach iwwerraschend duerch den Eggestein a Féierung gaangen a beim Stand vun 1:0 fir Werder goung et zu München op den Téi. Kuerz no der Stonn sinn d'Bayern nees zeréck an de Match komm, de Coman konnt fir den 1:1 suergen.

Dono war Bayern méi dominant, iwwerdeems Bremen ëmmer nees op Kontere gelauert huet - 5 Minutte viru Schluss haten d'Werderaner nach d'Chance op den 2:1, um Enn blouf et awer beim gerechten 1:1.

Gladbach - Augsburg 1:1
1:0 Neuhaus (5'), 1:1 Caligiuri (88')

An der Partie tëscht Gladbach an Augsburg huet ee sech am Virfeld eng Victoire fir d'Ekipp vum Trainer Rose erwaart. Schonn no 5 Minutte konnt ee well a Féierung goen, dat duerch den däitschen Nationalspiller Neuhaus. Am weidere Verlaf hunn d'Fohlen d'Partie geréiert, d'Chance op en 2:0 war och do, ma et goung mat der knapper 1:0-Féierung an d'Kabinnen.

Gladbach huet an der 2. Hallschecht de Fouss vum Gas geholl an de Géigner huet sech iwwerdeems selwer mat enger rouder Kaart geschwächt. Géint der Enn huet alles no enger knapper Victoire vun der Lokalekipp ausgesinn. Dat war d'Rechnung awer ouni déi Augsburger gemaach, well si sinn 2 Minutte viru Schluss duerch de Caligiuri zréck an de Match komm an hu schliisslech ee Punkt kënne mat heem huelen.

Hoffenheim - Stuttgart 3:3
1:0 Baumgartner (16'), 1:1 Gonzalez (18'), 1:2 Wamangituka (27'), 2:2 Sessegnon (48'), 3:2 Kramaric (71'), 3:3 Kempf (90'+3)

Schalke - Wolfsburg 0:2
0:1 Weghorst (4'), 0:2 Schlager (24')

Bielefeld - Leverkusen 1:2
0:1 Bailey (27'), 1:1 Hradecky (47' - Selbstgol), 1:2 Dragovic (88')

Klickt hei, fir op d'Säit mat all de Resultater ze kommen.