Am Damme-Basket stoung um Sonndeg nach ee Match vum 6. Spilldag um Programm. Hei huet sech Diddeleng bei der Etzella däitlech mat 81:57 konnte behaapten.

Iwwerdeems huet e Samschdeg den Owend scho sech Walfer am Spëtzematch doheem mat 88:79 géint de Gréngewald konnten duerchsetzen.

Etzella Ettelbréck 57:81 T71 Diddeleng (13:14, 15:20, 15:19, 14:28) 

Hunn d'Damme vun der Etzella ënnert dem Impuls vum Jovana Jaksic de bessere Start gehat, ass Diddeleng an der Suite awer ëmmer besser an de Match komm. Louche si nom 1. Véierel nach mat 1 Punkt am Avantage, louch de Virsprong an der Hallschent bei 6 Punkten. Am 3. a 4. Véierel ass et dunn eng däitlech Affär ginn. Diddeleng huet dominéiert an esou ass et och net verwonnerlech, dass d'Topscorerin mat 29 Punkten d'Shalonda Renae Winton op Diddelenger Säit ass. Op Ettelbrécker Säit huet et un der Ënnerstëtzung fir d'Jovana Jaksic gefeelt, sou dass d'Etzella verdéngt doheem mat 57:81 de Kierzeren zitt.

Gréngewald 70:88 Walfer (13:25, 36:41, 60:58, 70:88)

Beim Match tëscht dem aktuellen Tabellendrëtte vun Hueschtert an dem Tabellevéierte vu Walfer konnte sech d'Gäscht fréi ofsetzen. Déi éischt 7 Punkte goungen alleguer op de Kont vun den Damme vu Walfer. Duerno koum d'Lokalekipp besser an d'Partie, si konnten de Réckstand allerdéngs net verkierzen, esou dass et no 5 Minutte 7:13 aus hirer Sicht stoung. Bis zum Enn vum éischte Véierel war Walfer weider déi dominant Ekipp, esou dass si no 10 Minutte mat 25:13 vir louchen. Och am zweete Véierel waren déi éischt Minutte kloer fir Walfer, déi d'Avance op 15 Punkten ausbaue konnten, dëst beim Score vun 31:16. Duerno war de Gréngewald wéi ausgewiesselt. Offensiv huet vill méi geklappt a sou koume si bis zur Paus bis op 5 Punkten u Walfer erun.

No der Paus waren d'Damme vun Hueschtert weider beméit, de Match zu hirem Gonschten ze dréinen. No knapp 4 an enger hallwer Minutt am 3. Véierel war et hinnen dunn déi éischte Kéier an der Partie gelongen auszegläichen. Duerno war et eng spannend Partie, déi mat enger 60:58-Avance fir d'Lokalekipp an dee leschte Véierel goung. Bei Walfer war et virun allem d'Amanda Brooke Cahill, déi d'Gäscht am Match hale konnt, dëst mat insgesamt 34 Punkten. An de leschten 10 Minutten huet Walfer den Tempo dann nach eng Kéier ugezunn. De Gréngewald hat, nodeems si sech erëm an de Match gekämpft haten, net méi vill entgéintzesetzen. Am leschte Véierel geléngen der Lokalekipp nëmmen 10 Punkten. Soumat kënnen déi Walfer Dammen eng wichteg 88:70-Victoire iwwer de Gréngewald feieren.

Bartreng 48:82 Amicale (17:23, 29:42, 39:60, 48:82)

Conter 75:72 Basket Esch (16:19, 33:39, 54:54, 75:72)