An engem extrem spannende Match verléiert Lëtzebuerg onglécklech géint Island mat 84:86.

E Samschdeg war d'Lëtzebuerger Basketnationalekipp am leschte Match vun der 1. Ronn an der Pre-Qualifikatioun fir d'WM 2023 gefuerdert.

No engem relativ ausgeglachenen éischte Véierel hunn d'Lëtzebuerger an den zweeten 10 Minutte fiedere gelooss a mat engem Réckstand vu 14 Punkten an der Paus hat et net gutt fir d'Ekipp vum Ken Diederich ausgesinn. Mee no der Paus hunn d'Lëtzebuerger eng Reaktioun gewisen a si si ganz staark an de Match zeréckkomm. Um Enn war et e richtege Krimi an deem just 1 Punkt tëscht de béiden Ekippe louch. Um Enn verléiert Lëtzebuerg onglécklech mat 84:86 nodeems Island en 3er ganz zum Schluss konnt eraschéissen.

Domadder konnt sech Lëtzebuerg net fir den nächsten Tour an der WM-Pre-Qualifikatioun qualifizéieren.

Resumé vum Match

D'Lëtzebuerger si gutt an de Match gestart a konnte mat den Islänner mathalen. Direkt den éischte Versuch vun der 3er-Linn vum Alex Laurent ass am Kuerf gelant. Um Enn vum éischte Véierel konnte sech d'Islänner awer liicht ofsetzen, sou datt d'Islänner no den éischten 10 Minutte mat 29:23 am Avantage waren.

Am zweete Véierel konnten d'Islänner hiren Avantage liicht ausbauen an d'Lëtzebuerger haten e bësse Problemer, fir ze punkten. An d'Islänner hate vill Reussite vun der 3er-Linn. An de leschten 2:30 Minutte virun der Paus hunn d'Gäscht 4 vu 5 Dräier am Kuerf ënner bruecht, sou datt et mat engem 57:43 fir Island an d'Paus gaangen ass.

D'Lëtzebuerger si ganz staark aus der Vestiaire komm an dat mat Hëllef vun engem staarke Ben Kovac, dee gutt vun der 3er-Linn getraff huet. An der Defense ware se och méi opmierksam an hunn et den Islänner méi schwéier gemaach. 2 Minutte virum leschte Véierel haten d'Lëtzebuerger du just nach e Réckstand vun 2 Punkten. Mat engem 69:71 an der Siicht vu Lëtzebuerg ass et an de leschte Véierel gaangen.

An der Schlussphas vum leschte Véierel huet de Lëtzebuerger d'Reussite nees verlooss an d'Kierf wollten einfach net falen. Esou ass de Virsprong vun den Islänner nees direkt op 9 Punkten ugewuess. Mee nees eng Kéier hunn d'Lëtzebuerger Mentalitéit gewisen a sinn nees eng Kéier zeréckkomm, sou datt sech en extrem spannende Match entwéckelt huet. Sekonne viru Schluss konnten d'Lëtzebuerger mat engem Punkt a Féierung goen, ma den Islänner ass dunn nach een Dräier gekléckt. Ganz onglécklech verléiert Lëtzebuerg um Enn da mat 84:86.

Basket: WM-Pre-Qualifiers
Lëtzebuerg verléiert Krimi géint Island