Am moldawesche Championnat huet sech Tiraspol auswäerts mat 1:0 géint den FC Milsami duerchgesat.

E Méindeg war ee Lëtzebuerger Futtball-Nationalspiller mat sengem Veräin am Ausland am Asaz. De Sebastien Thill huet mat Sheriff Tiraspol mat 1:0 beim FC Milsami gewonnen. De Lëtzebuerger gouf an der 20. Minutt agewiesselt.

An der Tabell steet Tiraspol un der Spëtzt mat 64 Punkten an huet 9 Punkten Avance op den Zweeten FC Petrocub.

Sonndeg

An der 1. Liga an der Ukrain hu sech um Sonndeg den Owend zwee Lëtzebuerger géinteniwwer gestanen. No 90. Minutten huet Lviv mam Enes Mahmutovic mat 1:4 géint Dynamo Kiew de Kierzere gezunn. Bei Kiew ass de Gerson Rodrigues an der 61. Minutt ausgewiesselt ginn. Zu dësem Zäitpunkt stoung et 3:0 fir Kiew. Bei der Lokalekipp huet de Mahmutovic 90 Minutten duerchgespillt a krut an der 33. Minutt vum Arbitter déi Giel Kaart gewisen.

An der 1. Bundesliga huet sech de Leandro Barreiro mat Mainz eng batter Néierlag agefaangen. No engem decke Golkipp-Feeler huet Augsburg mat 1:0 zu Mainz gewonnen a ka sech iwwer wichteg 3 Punkte freeën. De Lëtzebuerger stoung déi 90 Minutten iwwer um Terrain.

An der Schwäiz hu sech d'Young Boys Bern no der Victoire géint Leverkusen ënnert der Woch an der Europa League am Championnat emol nees Punkte leie gelooss. Beim 2:2 géint Luzern stoung de Christopher Martins wéi och déi Woche virdru verletzungsbedéngt net am Kader vum Leader am schwäizer Championnat.

Am portugisesche Championnat huet Nacional Funchal mat 1:2 géint Sporting Braga de Kierzere gezunn. De Vincent Thill stoung bei Funchal an der Startformatioun a gouf an der 74. Minutt ausgewiesselt. D'Ekipp vum Lëtzebuerger steet aktuell op der 12. Plaz an ass 2 Punkte vun der Relegatiounsplaz ewech.

An der 2. Liga a Portugal huet Casa Pia 2:0 géint Oliveirense gewonnen. Bei der Victoire vu Pia ass de Marvin Martins an der 77. Minutt agewiesselt ginn.

An der hollännescher Eredivise huet de Mica Pinto a Sparta Rotterdam 0:2 géint Willem 2 verluer. Fir de Lëtzebuerger war de Match awer schonn no 30 Minutten eriwwer, dat well den Defenseur no enger Verletzung net méi weider konnt spillen.

Iwwerdeems huet an der 1. Liga an der Belsch de Standard Léck 1:3 géint Anderlecht de Kierzere gezunn. Anderlecht louch an der Paus mat 1:0 a Féierung. Lawrence a Dauda hunn de Match an de Schlussminutten dunn entscheet. De Laurent Jans stoung net am Kader vu Léck.

Sonndeg

Dem Oli Thill säi Veräin steet an der 1. Liga an der Ukrain elo op der 5. Tabelleplaz. An der 82. Minutte gouf de Lëtzebuerger Nationalspiller ausgewiesselt.

An der 3. Liga an Däitschland konnt Saarbrécken eng 3:1-Victoire géint den SC Verl feieren. De Lëtzebuerger Stiermer Maurice Deville gouf an der 67. Minutt beim Score vun 3:0 zu Gonscht vu senge Saarbrécker agewiesselt. Saarbrécken huet elo 3 Matcher um Stéck gewonnen.

An der Belsch hat den Danel Sinani mat Waasland-Beveren mat 0:2 géint de Cercle Bruges dee Kierzere gezunn. De Sinani gouf an der 65. Minutt agewiesselt.

An der 2. Liga an der Belsch huet Royale Union St Gilloise mat 3:2 géint Lommel gewonnen. Den Anthony Moris stoung bei der Lokalekipp wéi gewinnt tëscht Pottoen. Am Ufank hat et nach net no enger Victoire fir St. Gilloise ausgesinn, direkt an der éischter Minutt hat de Moris nämlech ee Gol kasséiert. Méi spéit am Match war d'Lokalekipp mat 1:2 a Réckstand geroden. Datt et um Enn awer nach mat der Victoire geklappt huet, hu si dem Undav ze verdanken. Hien huet nämlech direkt dräi Goler markéiert an domadder déi dräi Punkte geséchert. An der Tabell huet St. Gilloise 21 Punkte Virsprong op den Zweete Seraing.

A Griichenland stoung de Vahid Selimovic op en Neits net am Kader vu Kreta. Um 24. Spilldag huet d'Ekipp vum Lëtzebuerger Nationalspiller mat 1:2 géint Apollon Smyrnis verluer. Kreta steet aktuell mat 19 Punkten op der 11. Plaz an der Tabell, dat ënnert 14 Ekippen.

Freideg

E Freideg den Owend huet de Karlsruher SC an der 2. Bundesliga fir de Kont vum 23. Spilldag mat 1:0 zu Darmstadt gewonnen. Den decisive Gol huet den Choi an der 52. Minutt geschoss.

Karlsruhe, d'Ekipp vum blesséierten Dirk Carlson, huet sech domadder wichteg Punkten an der Course ëm den Opstig geséchert. An der provisorescher Tabell huet een domadder op d'mannst fir eng Nuecht just nach dräi Punkte Retard op déi véier punktgläich Veräiner un der Spëtzt Hamburg, Fürth, Bochum a Kiel.