De Progrès Nidderkuer séchert sech a leschter Minutt nach ee Punkt op der Escher Grenz, dëst beim 2:2, Hesper wënnt spéit mat 2:1 géint Rodange.

Um Samschdeg den Owend war et den Ufank vum 15. Spilldag an der BGL Ligue, wou et ënnert anerem zum Spëtzematch tëscht dem Leader Diddeleng an dem Opsteiger aus Wolz koum.

De Liveticker vun all de Matcher fir nozeliesen.

D'Resuméë vun de Matcher

Diddeleng 3:3 Wolz
1:0 van den Kerkhof (29', Eelefmeter), 2:0 Kirch (38'), 2:1 Ibrahimovic (44', Eelefmeter), 2:2 Ibrahimovic (45'+1), 2:3 Vaccaro (50'), 3:3 Schaus (78')

No enger relativ schwaacher Ufanksphas hat et bis zur 29. Minutt gedauert, éiert et richteg geféierlech gouf. No engem Handspill am Strofraum vum Dachelet hat den Här Krüger op Eelefmeter zu Gonschte vun der Lokalekipp entscheet. De van den Kerkhof hat sech des Chance net huele gelooss a sou konnt de Leader a Féierung goen. Diddeleng war duerno déi besser Ekipp a sou konnt de Kirch mat engem herrleche Schoss aus ronn 16 Meter op 2:0 stellen. Wolz, vun deene bis dohin net vill ze gesi war, konnt de Match awer nach virun der Paus dréinen. A verréckte Minutte virum Téi war et an der 44. Minutt de Cabral, deen ee Feeler am Strofraum um Burkic gemaach hat. Den Ibrahimovic konnt aus 11 Meter sécher verwandelen, éiert et op en Neits de Wëlzer Stiermer war, deen de Match an der Nospillzäit vun der éischter Hallschent ausgläiche konnt.

Kuerz nom Téi konnt d'Ekipp aus dem Norde vum Land de Match souguer komplett dréinen, dëst nodeems de Vaccaro an der 50. Minutt eng flott Kombinatioun erfollegräich ofschléisse konnt. Diddeleng konnt sech um Enn awer nach fir hir Beméiunge belounen. Den agewiesselte Schaus konnt an der 78. Minutt de verdéngten Ausgläich markéieren. Soumat bleift Diddeleng och weiderhin un der Spëtzt.

RTL

© Eugène Thommes

Jeunesse Esch 2:2 Progrès Nidderkuer
0:1 Bah (1'), 0:2 Ba (26'), 1:2 Ouwo Moussa (32'), 2:2 Deidda (90'+4)

Op der Escher Grenz goung et beim Match tëscht der Lokalformatioun an dem Progrès vun Nidderkuer ëm wichteg Punkte, fir den Uschloss no uewen net ze verléieren. Fir d'Gäscht gouf et deen erwënschte Start an de Match. An der éischter Spillminutt konnt de Bah de Progrès a Féierung bréngen. Beim Bastos sengem Schoss konnt de Fox am Escher Gol nach paréieren, ma beim Noschoss vum Bah hat hie keng Chance méi. D'Jeunesse wollt eng Reaktioun weisen, ma si konnte sech awer keng zwéngend Geleeënheet erausspillen. An der 26. Minutt konnt de Ba dann no enger Flank op 2:0 erhéijen, ma dës Freet war awer net vu laanger Dauer, dëst well den Ouwo Moussa an der 32. Minutt den Uschloss markéiere konnt.

Nom Säitewiessel war et weiderhin eng intensiv Partie. Béid Ekippen ware beméit, fir de Match op hir Säit ze zéien. D'Jeunesse Esch hat an der 77. Minutt nach eng Kéier déi grouss Chance, fir den Ausgläich ze markéieren, ma et hat um Enn awer un der néideger Prezisioun gefeelt. De Progrès hat an der Schlussphas ewell déi Vainqueur gewierkt, ma an der Nospillzäit konnt d'Jeunesse de verdéngten Ausgläich markéieren. No engem Corner konnt den agewiesselte Spiller de Ball mam Kapp am Filet ënnerbréngen.

Rodange 1:2 Swift Hesper
0:1 Francoise (20'), 1:1 Ndiaye (28'), 1:2 Schnell (86')

RTL

© Christophe Mersch

D'Tabell vun der BGL Ligue