Och den Danel Sinani, an de Mica Pinto konnten hir Ekippen um Samschdeg a Féierung bréngen an um Enn zu enger Victoire verhëllefen.

An der éischter Divisioun an der Ukraine konnt sech Dynamo Kiew mat 2:1 duerch e Gol vum Gerson Rodrigues an der 90. Minutt géint Oleksandrija duerchsetzen. De Lëtzebuerger gouf an der 73. Minutt agewiesselt.

An der éischter Ukrainescher Divisioun hu sech den Olivier Thill a Poltawa misse mat 0:2 géint Donezk geschloe ginn. De Lëtzebuerger Nationalspiller gouf an der Paus ausgewiesselt. An der Tabell steet Poltawa weider op der gudder 5. Plaz.

An der zweeter Portugisescher Liga konnt sech den Eric Veiga mat Vilafranquense mat 2:1 géint Mafra duerchsetzen. De Lëtzebuerger stoung an der Startopstellung a gouf an der Paus ausgewiesselt.

An der Schwäiz wannen d'Young Boys Bern mat 3:0 zu Sion a stinn an der Tabell mat engem Virsprong vun 22 Punkten op der 1. Plaz. De Christopher Martins stoung op en Neits net am Kader.

Och de Laurent Jans stoung bei der 2:1-Victoire vum Standard Léck géint Gent an der éischter Belscher Divisioun net am Kader.

Samschdeg

An der Jupiler League ass et fir den Danel Sinani mat Waasland-Beveren géint de KV Oostende gaangen. De Lëtzebuerger Nationalspiller gouf an der 16. Minutt agewiesselt a konnt seng Ekipp an der 23. Minutt souguer a Féierung bréngen. Um Enn steet eng wichteg 2:0-Victoire fir d'Ekipp vu Waasland-Beveren, déi zwar weiderhin op der leschter Tabelleplaz steet, duerch déi dräi Punkten awer nees méi no un déi aner Ekippen erukënnt.

Sparta Rotterdam huet et um 28. Spilldag an der hollännescher Eredivise mam direkte Konkurrent PEC Zwolle ze di krut. No 7 Minutte war et de Mica Pinto, dee seng Ekipp mat 1:0 a Féierung brénge konnt. Duerno konnt Zwolle de Match zwar mat zwee Goler dréinen, ma dorop hat Sparta eng Äntwert. Der Ekipp ëm de Lëtzebuerger Nationalspiller ass et duerch zwee Goler vum Thy gelongen d'Féierung nees hierzestellen a sou steet um Enn eng 3:2-Victoire. De Mica Pinto war an der 83. Minutt ausgewiesselt ginn.

An der zweeter belscher Liga konnt sech d'Union Saint-Gilloise eng weider Victoire sécheren. Den Anthony Moris huet beim 2:0 géint den RFC Seraing säi Gol propper gehal.

Fir den OFI Kreta gouf et am Match géint Giannina eng 2:1-Victoire, dat trotz engem 0:1 Réckstand. De Vahid Selimovic war am Kader, ass awer net zum Asaz komm.

Fir de Leandro Barreiro ass et an der Bundesliga mam 1.FSV Mainz e Samschdeg de Mëtteg géint Bielefeld en 1:1 ginn. Dobäi war hien de ganze Match iwwer am Asaz.

An der 3. däitscher Liga huet den 1. FC Saarbrécken 2:2 géint Wehen Wiesbaden gespillt. Trotz enger 2:0-Féierung huet Saarbrécken d'Féierung nach duerch zwee spéit Géigegoler an der 84. an der 92. Minutt verspillt. De Maurice Deville gouf an der 85. Minutt agewiesselt.