De Martins huet den tëschenzäitlechen 1:0 fir Bern geschoss. De Barrerio huet um Sonndeg net nëmmen e Gol geschoss, mee och nach e Gol virbereet.

De Christopher Martins huet seng Ekipp an der 62. Minutt a Féierung geschoss. Ronn 10. Minutte méi spéit war säin Aarbechtsdag dunn eriwwer. D'Young Boys Bern wannen um Enn mat 2:0 géint St. Gallen. De Lëtzebuerger ass mat de Young Boys Bern domat d'Revanche gelongen, hu si ënnert der Woch an der Coupe nach géint St. Gallen de Kierzere gezunn.

An der 1. däitscher Bundesliga ass et um Sonndeg den Owend zum Ofstigskrimi tëscht Köln a Mainz komm. Nodeems Mainz no Viraarbecht vum Leandro Barreiro duerch de Boetius schnell a Féierung gaangen ass, huet Köln an der Suite de Match gedréint a louch tëschenzäitlech mat 2:1 a Féierung. Nom Ausgläich vum Onisiwo an der 65. Minutt huet dunn de Leandro Barreiro an der Nospillzäit deen esou wichtegen 3:2 fir Mainz geschoss an ass domadder zum absolutte Matchwinner bei Mainz avancéiert. De Resumé vum Match fannt Dir am Artikel vum internationale Futtball.

Den Oli Thill gewënnt mat Worskla Poltawa géint Lviv mam Enes Mahmutovic. Béid Spiller stoungen an der 1. Liga an der Ukrain déi 90 Minutten um Terrain. No 8. Minutte krut den Enes Mahumutovic beim Stand vun 0:0 déi Giel Kaart gewisen. Nodeems Lviv an de 15. Minutt een Eelefmeter laanscht geschoss huet, waren et an der zweeter Hallschent den Oli Thill a seng Matspiller, déi de Match an d'Hand geholl huet an esou um Enn mat 2:1 gewannen.

An engem geckege Match an der Belscher Jupiler League zitt Waasland-Berveren mam Danel Sinani 3:4 de Kierzere géint Kortijk. De Lëtzebuerger Nationalspiller stoung wuel vun Ufank un um Terrain, huet d'Spillfeld awer no 63. Minutte fir den Efford beim Stand vun 2:3 verlooss.

A Portugal war et an der 1. Liga fir Nacional Funcha mam Vincent Thill e schwaarzen Nomëtteg. Et ass beim Lëtzebuerger senger Ekipp net vill zesumme gelaf an esou verléiert Nacional Funchal mat 1:5 géint Santa Clara. Den FLF-Spiller ass an der 77. Minutt ausgewiesselt ginn.

An der 2. portugisescher Liga ass den Eric Veiga iwwerdeems bei der 1:3-Néierlag vu senger Ekipp Vilafranquense géint Estoril Praia an der 71. Minutt agewiesselt ginn. Vilafranquense steet no 28. Spilldeeg op der 15. Plaz.

Samschdeg

Kiew mam Gerson Rodrigues wënnt 2:0 géint Dnipro-1. De Lëtzebuerger Nationalspiller gouf bei Kiew an der 59. Minutt beim Score vun 1:0 agewiesselt. Kiew steet an der Ukrain domat weiderhin un der Spëtzt vum Championnat.

An der hollännescher Eredivisie gouf et fir de Mica Pinto iwwerdeems eng 0:2-Defaite mat Sparta Rotterdam géint AZ Alkmaar. De Lëtzebuerger Nationalspiller gouf an der 76. Minutt ausgewiesselt. Alkmaar steet domat weider op der 2. Tabelleplaz, fir Sparta Rotterdam an de Pinto ass et aktuell déi 11. Tabelleplaz.

An der 3. däitscher Liga konnt Saarbrécken eng 2:1-Victoire géint Türkgücü München feieren. De Maurice Deville stoung bei Saarbrécken net am Kader. D'Ekipp vum Lëtzebuerger steet elo mat 49 Punkten op der 5. Tabelleplaz.

Freideg

E Freideg den Owend huet Léck mat 4:0 zu Eupen gewonnen. D'Goler hunn den Amallah (43', 68'), de Muleka (71') an de Lestienne (85') geschoss. De Laurent Jans stoung beim Standard net am Kader. No 33 Spilldeeg huet Léck 47 Punkten um Konto an ass um gudde Wee, fir sech eng Plaz an der Europa-League-Grupp ze sécheren.