Schalke kann och emol nees gewannen a Juventus Turin klappt iwwerdeems Genua mat 3:1. Manchester United gewënnt géint Tottenham a Monaco klappt Dijon. 

Nieft dem Leandro Barreiro waren nach eng sëlleg aner Lëtzebuerger Futtballer e Sonndeg am Asaz. Den Iwwerbléck fannt Dir hei.

Bundesliga

Schalke 04 - FC Augsburg 1:0
1:0 Serdar (4')

Schalke ass perfekt an de Match gestart. No enger flotter Aktioun vum Hunterlaar a Bozdogan an enger onglécklecher Aktioun vum Keeper Gikiewicz stoung de Serdar goldrichteg an huet Schalke no 4. Minutte mat 1:0 a Féierung geschoss. Augsburg hat wuel déi eng oder aner Chance, mee ënnert dem Impuls vum staarken Hunterlaar ass Schalke mat der Féierung an d'Paus gaangen. An deenen zweete 45. Minutten war Augsburg en Tick besser, Farmberger a Richter sinn awer um Fährmann hänke bliwwen. Schalke konnt sech an de Schlussminutten iwwer Waasser halen an esou kënne sech déi Kinneksblo net ganz onverdéngt eng éischte Kéier ënnert dem Dimitrios Grammozis 3 Punkte sécheren.

1. FC. Köln - FCV Mainz 2:3
0:1 Boetius (11'), 1:1 Duda (43'), 2:1 Skhiri (61'), 2:2 Onisiwo (65'), 2:3 Barreiro (90+1')

Virum Match war d'Zil vu béiden Ekippe kloer. Si wollte sech an der Lutte géint den Opstig dräi wichteg Punkte géint en direkte Géigner sécheren. An esou huet Mainz direkt mat der 1. Chance fir den éischte Gol an dësem Krimi gesuergt. No engem flotten Zouspill vum Lëtzebuerger Leandro Barreiro huet de Boetius de Ball aus ronn 17 Meter an de Filet gesat. Net nëmmen den 1:0 fir Mainz, mee och e Scorerpunkt fir de Barreiro. Köln huet sech awer net verstoppt an hat duerch den Andersson 2 richteg gutt Chancen. Kuerz virum Gang an d'Kabinne krut Köln dunn en Eelefmeter zougesprach. Den Duda huet et sech net huele gelooss an esou stoung et an der Paus 1:1-Gläich.
Och nom Téi hate béid Formatioune gutt Geleeënheeten, virun allem Köln ass ëmmer nees geféierlech virum Mainzer Gol opgedaucht. Nom verdéngten 2:1 duerch de Skhiri an der 61. Minutt konnt Mainz mam Onisiwo kuerz dorop de Score erëm ausgläichen. An der Nospillzäit huet dunn dem Barreiro seng Stonn geschloen. Hie kënnt fräi am Strofraum zum Schoss a léisst dem Horn keng Chance a schéisst domat säin 2. Gol an dëser Saison. Mainz gewënnt duerch de Lucky Punch vum Lëtzebuerger mat 3:2 géint Köln a feiert immens wichteg 3 Punkten.

Am Ofstigskampf steet Schalke an der Tabell mat 13 Punkten op der leschter Plaz mat 13 Punkten. Da kënnt Köln mat 23 Punkten. Op der Relegatiounsplaz steet Bielefled mat 26 Punkten, dat Punktgläich mat Hertha. Mainz huet op der 14. 28 Punkten.

E Sonndeg den Owend koum d'Nouvelle, datt de Markus Gisdol net méi Trainer vum 1. FC Köln ass.

Premier League

West Ham United - Leicester City 3:2
1:0 Lingard (29'), 2:0 Lingard (44'), 3:0 Bowen (48'), 3:1 Iheanacho (70'), 3:2 Iheanacho (90+1')

Am Spëtzematch vum 31. Spilldag an der Premier League huet sech West Ham doheem mat 3:1 géint Leicester duerchgesat a feiert dräi immens wichteg Punkten am Kampf ëm d'Champions-League-Plazen. Spiller vun der 1. Hallschent war op Säite vun der Lokalekipp de Lingard, deen direkt mat 2 Goler seng Ekipp mat enger 2:0 Féierung an d'Paus geschoss huet. Nodeems de Bowen direkt nom Säitewiessel de Score op 3:0 geschrauft huet war den Drops gelutscht. Leicester ass wuel nach emol erukomm, konnt aus senge Chancen awer just nach den Uschlossgol op 2:3 markéieren. West Ham war dogéint immens effizient an huet aus quasi all Chance e Gol markéiert. De Réckstand op Leicester läit elo nëmmen nach bei engem Punkt.

Tottenham Hotspur - Manchester United 1:3
1:0 Son (40'), 1:1 Fred (57'), 1:2 Cavani (79'), 1:3 Greenwood (90+6')
Bei Tottenham wéist d'Bilanz weider no ënnen iwwerdeems Manchester United sech op der 2. Plaz an der Tabell festsetzt. Tottenham ass mam Gol vum Son wuel a Féierung gaangen, konnt awer alt erëm de Virsprong net iwwert d'Zäit bréngen. D'Red Devils hunn an der zweeter Hallschent eng kloer besser Leeschtung gewise wéi nach am Ufank vum Match, sou dass si sech déi 3 Punkte verdéngt erspillt hunn. Fir Tottenham ass et iwwerdeems déi 10. Néierlag an dëser Saison. D'Spurs musse sech ferm strecken, fir d'nächst Joer europäesch spillen ze kënnen.

Serie A

Inter Mailand - Cagliari Calcio 1:0
1:0 Darmian (77')

Inter Mailand bleift d'Ekipp vun der Stonn an der italienescher Serie A. Mat der 11. Victoire um Stéck sinn Nerazzurri weiderhin um Wee, sech Meeschterkroun ze kropen. De Virsprong op den AC Mailand läit aktuell bei 11 Punkten. Et huet awer bis zur 77. Minutt gedauert éier den Darmian den entscheedende Gol vum Dag konnt schéissen.

Juventus Turin - CFC Genua 3:1
1:0 Kulusevski (4'), 2:0 Morata (22'), 2:1 Scamacca (49'), 3:1 McKennie (70')
D'Lokalekipp ass duerch e Gol vum Kulusevski fréi a Féierung gaangen, éier de Morata an der 22. Minutt de Score op 2:0 erhéije konnt. Kuerz no der Paus ass dunn awer den iwwerraschenden Uschlossgol fir Genua gefall. Den Underdog huet sech wuel net geschloe ginn, de McKennie huet awer fir Juventus mam 3:1 an der 70. Minutt fir de Schlusspunkt gesuergt.

Ligue 1

OGC Nice - Stade Reims 0:0

AS Monaco - FCO Dijon 3:0
1:0 Jovetic (49'), 2:0 Ben Yedder (63'), 3:0 Ben Yedder (89')

Monaco kann och géint Dijon gewannen a bestätegt domat seng aktuell gutt Form. Jovetic an zwee Goler vum Ben Yedder sinn duergaangen, fir Djion ze klappen.  D'Ekipp vum Nico Kovac läit an der Tabell domat 4 Punkten hannert Lille an nëmmen 1 Punkt hannert dem PSG.

La Liga

FC Villarreal - CA Osasuna 1:2
0:1 Moncayola (64'), 1:1 Garcia (70'), 1:2 Budimir (74')

An enger enker Partie konnt sech de Favorit vu Villareal no enger verbesserter zweeter Hallschent an 2 Goler bannent 10 Minutte mat 2:1 géint Osasuna duerchsetzen.

FC Valencia - Real Sociedad 2:2
0:1 Guevara (33'), 0:2 Isak (45'), 1:2 Wass (60'), 2:2 Gabriel Paulista (73')

Nodeems Valencia an der 26. Minutt déi grouss Chance per Eelefmeter a Féierung ze goen net notze konnt, huet Real Sociedad nach virun der Paus konnten duerch de Guevara an den Isak zwee Goler markéieren. An enger opreegender Partie ass Valencia du lues a lues besser an de Match komm a konnt sech duerch eng staark Leeschtung nach 1 Punkt géint Real Sociedad erkämpfen.