Bei den Damme kann iwwerdeems an enger serréierter Partie Ettelbréck géint de Basket Esch mat 63:59 gewannen. 

E Sonndeg den Owend war an der Total League bei den Dammen an och bei den Hären d'Suite vum 14. Spilldag.

Härebasket

Etzella - Racing 82:75 (20:24, 17:19, 23:18, 22:14 )

De Racing ass besser an de Match komm a louch esou no knappe 5 Minutte mat 12:7 a Féierung. An der Suite ass et hin an hier gaangen, ouni dass eng Ekipp sech kloer konnt ofsetzen, sou dass et no 10 Minutten aus der Siicht vun der Lokalekipp 20:24 stoung. Och am 2. Quarter war et eng serréiert Partie. Ënnert dem Impuls vum Philippe Gutenkauf war d'Etzella wuel weider beméit, mee hat virun allem vun der 3er-Linn eng schwaach Quote opweises. De Réckstand an der Paus louch sou bei 6 Punkten.

An der 2. Hallschent sollt sech d'Bild dréinen. D'Etzella war en Tick méi waakreg wéi nach am Ufank a konnt de Réckstand step by step egaliséieren. Louch de Réckstand virum leschte Véierel nëmmen nach bei engem Punkt, hunn Delgado, Gutenkauf a Burgett an der Schlussphas opgedréint an de Match komplett gedréint, sou dass si sech mat 82:75 géint de Stater Racing kënne behaapten. Bei de Gäscht hat een d'Impressioun, dass zum Schluss d'Loft e bësse géif ausgoung, sou dass 20 Punkte vum Jordan Giles net duergaange sinn, eppes vu Ettelbréck mat heem ze huelen.

Diddeleng - Contern 88:91 (25:14, 40:44, 64:67, 88:91)

Contern klappt Diddeleng an engem spannendem Match
Contern ass ëmmer besser an de Match komm an huet de Match zu senge Gonschte gedréint. 

Déi Diddelenger, déi als Favorit an de Match gaange sinn, hu sech am éischte Véierel vun hirer beschter Säit presentéiert a sou si si och fréi a Féierung gaangen, déi si no den éischten 10 Minutten op 11 Punkte festsetze konnten, dëst beim Score vu 25:14. Duerno koum Contern awer ëmmer besser an de Match an Diddeleng ass am zweete Véierel virun allem offensiv net vill agefall. Duerch eng kämpferesch a spilleresch staark Leeschtung konnte si de Match zu hire Gonschten dréinen. Dëst war virun allem dem Nicolas Hittelet senge 4 Dräier um Stéck ze verdanken.

Duerno war et eng serréiert Partie bei där Contern weider alles dogéint gesat huet, wat se haten. Diddeleng konnt de Réckstand net ophuelen oder de Match dréinen a sou goung Contern mat enger knapper 3-Punkten-Avance an de leschte Véierel. Trotz 31 Punkte vum Stephen Harris konnt Diddeleng de Match net op hir Säit zéien a sou ka Contern um Enn eng iwwerraschend 91:88-Victoire feieren.

Walfer - Musel Pikes 102:71 (23:18, 45:41, 79:60, 102:71)

Keng Chance fir d'Pikes géint Walfer
De Musel Pikes ass d'Loft um Enn ausgaangen a Walfer konnt seng offensiv Qualitéite voll ausspillen.

Fir de Leader Walfer gouf et um Enn eng däitlech 102:71-Victoire géint d'Musel Pikes. An den éischte Minutte konnt d'Résidence och fréi mat 12:5 a Féierung goen, ma d'Musel Pikes konnten de Réckstand bis zum Enn vun den éischten 10 Minutte nach eng Kéier verkierzen. Am zweete Véierel war et eng enk Partie, dëst well och d'Musel Pikes vollen Asaz gewisen hunn.

Am drëtte Véierel konnten déi Walfer Hären den Tempo awer entscheedend unzéien an hir Féierung kloer ausbauen. De Musel Pikes ass d'Loft um Enn ausgaangen a Walfer konnt seng offensiv Qualitéite voll ausspillen, sou dass et um Enn eng ganz däitlech Victoire fir de Leader gouf.

Hiefenech -  Sparta Bartreng 73:62 (18:21, 36:39, 47:49, 73:62)

Hesper - Basket Esch 67:112 (23:30, 38:63, 56:95, 67:112)

Arantia Fiels - Steesel 89:81 (25:23, 43:44, 60:65, 89:81)

Dammebasket

Etzella Ettelbréck - Basket Esch 63:59 (19:19, 13:14, 13:18, 18:8)

An enger immens serréierter Partie hu sech béid Ekippen näischt geschenkt. E ganz staarkt Jovana Jaksic, wat um Enn 23 Punkten opweise konnt, huet d'Etzella ugefouert a Richtung Victoire geschoss. Stejskalova a Co. hu sech awer net beandrocke gelooss an esou louch Esch an der Paus mat 1. Punkt a Féierung. Och den 3. Quarter ware Esch déi méi effizient Ekipp, éier am leschte Véierel d'Etzella mat engem 18:8 de Match nach dréine konnt a sech um Enn knapp's mat 63:59 duerchsetze konnt.

Musel Pikes - Diddeleng 58:75 (13:16, 29:29, 41:47, 58:75)

Diddeleng gewënnt de Spëtzematch géint d'Musel
Eng iwwerraschend däitlech 75:58-Victoire zu Gonschte vun den Diddelenger Dammen.

Am Spëtzematch bei den Damme gouf et eng iwwerraschend däitlech Victoire fir den T71 Diddeleng. Am éischte Véierel war et nach eng serréiert Partie, bei där Diddeleng wuel a Féierung goe konnt, ma de Leader vun der Musel war awer nach net geschloen. Am zweete Véierel konnte sech d'Damme vun der Lokalekipp weider an de Match kämpfen a sou goung et no enger ganz serréierter éischter Hallschent mat 29:29 an d'Paus.

No der Paus sinn déi Diddelenger ëmmer méi staark ginn a virun allem offensiv ware si géigeniwwer vun de Musel Pikes iwwerleeën. Ugefouert vum Nadia Massong mat 24 Punkten an dem Shalonda Winton mat 23 Punkte konnte si hir Stäerkt an der Offensiv virun allem am leschte Véierel weisen, a sou gouf et eng um Enn iwwerraschend däitlech 75:58-Victoire zu Gonschte vun den Diddelenger Dammen.

Steesel - Walfer 79:87 (9:20, 25:46, 52:65, 79:87)

Contern - Gréngewald Hueschtert 51:77