Den Exekutivcomité vun der Uefa huet d'Reform vun der Champions League accordéiert an offiziell annoncéiert.

Den Exekutivcomité vun der UEFA, der europäescher Futtball Unioun huet d'Champions-League-Reform ugeholl, an déi sougenannte Super League, déi vun 12 europäeschen Toppveräiner an d'Gespréich bruecht gouf, op d'schäerfst verurteelt.

Deemno wäerte vun 2024 un 36 am Plaz vu bis elo 32 Clibb an der Haaptronn vun der Kinneksklass am europäesche Futtball spillen.

CL Reform/Reportage Franky Hippert

Et gëtt keng Gruppephas méi, mä et ass eng Form vun engem Championnat. All Ekipp kritt dann 10 Matcher ze spillen, bis elo waren et der 6. Fir den FLF-President Paul Philipp, deen en Dënschdeg och um Kongress vun der Uefa an der Schwäiz dobäi ass, ass kloer, ëm wat et bei där Reform, déi dann an 3 Joer a Kraaft trëtt, soll goen:

Méi Matcher bedeite méi Gelder. Mä mir wäerten dat muer wuel just presentéiert kréien, et wäert kee Vott méi geholl ginn.

Um Méindeg koum jo op eemol nees déi Propos, dës Kéier vun 12 groussen europäesche Veräiner, fir eng sougenannte Super League ze maachen. D'Uefa ass awer, genee wéi e ganz groussen Deel vun der internationaler Futtballwelt, guer net vun deem Virstouss begeeschtert:

D’Uefa an och d’Fifa hu jo kloer gesot, datt déi Veräiner dann net méi europäesch däerfe spillen an hir Spiller net méi fir d’Nationalequipe.

Deen aktuellen Plang vun där Super League sinn ënnert der Fieder vun de Presidenten vun Real Madrid an vu Juventus Turin entstanen. Nieft veschidde spueneschen an italieneschen Equippen sollen och nach 6 englesch Veräiner dobäi sinn. Bayern München a Paris Saint Germain sinn dës Kéier keen Deel vun deem Ganzen.