Mat enger Galavirstellung géint Gladbach huet den FCB e Samschdeg den Owend gewisen, wien déi stäerken Ekipp am däitsche Futtball ass.

An der däitscher Bundesliga war et e Samschdeg d'Suite vum 32. Spilldag an hei ass déi definitiv Decisioun ëm de Championstitel gefall. Borussia Dortmund huet sech no engem spannende Match mat 3:2 géint Leipzig behaapt an domadder konnt sech den FC Bayern München scho virum Match géint Gladbach iwwert den 30. Titel an der Bundesliga freeën.

Fir den Dag perfekt ze maachen, huet den FCB sech e Samschdeg den Owend eng kloer 6:0-Victoire géint desolat Gladbacher geséchert. Déi elo e klengt Wonner brauchen, fir sech nach fir d'Europa League ze qualifizéieren.

Bei der Ekipp vum Flick huet op en Neits de Lewandowski erausgestach. De Weltfuttballer huet schonn an der 2. Minutt markéiert an an der 34. a 66. Minutt (Eelefmeter) huet en d'Goler 38 an 39 an dëser Saison geschoss. Domadder ass de Pol nëmmen nach ee Gol vum Rekord vum Gerd Müller ewech. Déi aner Goler fir déi Münchner hunn de Müller (23'), de Coman (44') an de Sane (86') geschoss.

Dortmund huet et géint Leipzig spannend gemaach. No Goler vu Reus (7') a Sancho (51') huet et laang no enger souveräner Victoire ausgesinn. Ma Leizpig konnt zeréck an de Match kommen. De Klostermann (64') an den Olmo (77') konnte fir d'Gäscht ausgläichen. Der Lokalekipp ass awer nach eng Reaktioun gelongen an esou huet de Sancho an der 87. Minutt mam 3:2 dem BVB awer nach déi dräi Punkte geséchert. Fir déi Dortmunder ass et zwee Spilldeeg virum Enn vun der Saison eng ganz wichteg Victoire. Reus a Co wëlle sech jo nach fir d'Champions League qualifizéieren. Duerch dës Victoire ass een an der Tabell laanscht Frankfurt gezunn. D'Eintracht spillt e Sonndeg eréischt géint Mainz. Dortmund huet mat der Victoire och d'Generalprouf fir den DFB Pokal fir sech entscheet. En Donneschdeg kritt een et an der Finall jo mat Leipzig ze dinn.

Eng kloer 4:2-Victoire gouf et iwwerdeems fir Hoffenheim géint Schalke. D'Gäscht hunn dobäi eng 2:0-Féierung aus der Hand ginn.

Werder Bremen a Leverkusen hu sech d'Punkte gedeelt. Bremen bleift domadder matten am Ofstigskampf. Leverkusen bleift op enger vun den Europa-League-Plazen.

An dann huet Wolfsburg Union Berlin mat 3:0 geklappt. D'Goler huet alleguer de Brekalo geschoss.

Klickt hei, fir op weider Resultater vum Internationale Futtball ze kommen.

32. Spilldag vun der Futtball-Bundesliga

Borussia Dortmund - RB Leipzig 3:2
1:0 Reus (7'), 2:0 Sancho (51'), 2:1 Klostermann (64'), 2:2 Olmo (77'), 3:2 Sancho (87')

Hoffenheim - Schalke 4:2
0:1 Uth (12'), 0:2 Mustafi (42'), 1:2 Kramaric (47'), 2:2 Akpoguma (52'), 3:2 Baumgartner (60'), 4:2 Bebou (64')

Werder Bremen - Leverkusen 0:0

Wolfsburg - Union Berlin 3:0
1:0 Brekalo (12'), 2:0 Brekalo (63'), 3:0 Brekalo (90')

Bayern München - Borussia Mönchengladbach 6:0
1:0 Lewandowski (2'), 2:0 Muller (23'), 3:0 Lewandowski (34'), 4:0 Coman (44'), 5:0 Lewandowski (66'), 6:0 Sane (86')

Klickt hei, fir op d'Säit mat all de Resultater ze kommen.