E Samschdeg war et am nationale Futtball-Championnat den Optakt vum 26. Spilldag.

Um 26. Spilldag an der BGL Ligue kënnt et zu engem Wiessel un der Tabellespëtzt. Den F91 Diddeleng ass no enger klorer Victoire géint d'Jeunesse den neie Leader, dat well d'Fola géint d'Etzella mat 2:3 de Kierzere gezunn huet. Den F91 huet elo eng Avance vun 2 Punkten op déi Escher.

Déi Diddelenger hu sech e Samschdeg den Owend héich verdéngt mat 5:1 géint d'Jeunesse duerchgesat. D'Gäscht hunn déi 90 Minutten iwwer kaum eppes zougelooss an um Enn no Goler vu Bettaieb (29'), Nader (36', 45+1'), Schaus (77') a Stumpf (88') gewonnen. Fir d'Jeunesse, déi vun der 66. Minutt un an Ënnerzuel war, ass et e Réckschlag an der Course ëm déi international Plazen.

D'Fola huet iwwerraschend mat 2:3 bei der Etzella verluer. Déi Escher hate wuel de bessere Start an de Match a louchen no engem Selbstgol vum Da Silva an engem Gol vum Hadji schonn no 20 Minutte mat 2:0 a Féierung, ma déi Ettelbrécker hu sech net verstoppt an esou konnte si de Match nach dréinen. De Kadrija hat virun der Paus op 1:2 verkierzt, ier den Hemkemeier an de Bidon déi dräi Punkte perfekt gemaach hunn.

Keng Chance hat dann Hueschtert géint de Progrès. Nidderkuer huet no engem 3:0 bei der USH déi dräi wichteg Punkten an der Course ëm déi véiert Plaz an der Tabell mat Heem geholl. D'Goler hunn den Hend (Eelefmeter, 15'), den Tekiela (80') an de Shala (86') geschoss.

An der Tabell huet de Progrès weider e Retard vun engem Punkt op de Véierten de Racing. De Stater Veräin huet Stroossen mat 2:1 geklappt. An der éischter Hallschent hu béid Ekippen op Aenhéicht gespillt. D'Goler sinn dunn am zweeten Duerchgang gefall. De Racing koum mat vill Vitesse aus der Kabinn an ass an der 54. Minutt duerch den Nakache a Féierung gaangen. E puer Minutte méi spéit konnte sech och d'Gäscht duerch e Selbstgol vum Omrani freeën. Den Dembélé huet dunn awer an der Schlussphas seng Faarwe nees a Féierung bruecht an domadder de Match decidéiert.

Wolz huet sech verdéngt mat 2:0 zu Rouspert duerchgesat. D'Gäscht hunn déi 90 Minutten iwwer mat vill Tempo no vir gespillt a stoungen an der Defense stabil. D'Goler fir de Veräin aus dem Norde vum Land hunn de Philipps an der 47. Minutt an den Timmermans an der 56. Minutt geschoss.

Den Iwwerbléck vun der BGL Ligue

De Liveticker an de Video vun de Matcher fir nozeliesen respektiv nozekucken.

D'Tabell vun der BGL Ligue