OSC Lille ka sech no enger 2:1-Victoire géint Angers fir déi 4. Kéier d’Kroun a Frankräich opsetzen a feiert den Titel virum PSG, déi um Enn op déi 2. Plaz kommen. An der 2. Liga an Däitschland ass et Bochum a Fürth déi opsteigen, Kiel muss géint Köln an d’Relegatioun.
An der 2. däitscher Bundesliga ass um Sonndeg de Mëtteg d’Entscheedung gefall, wien an déi 1. Liga dierf opsteigen. Bochum, déi 3:1 géint Sandhausen gewonnen hunn a Greuther Fürth kënne sech um Enn iwwert den Opstig freeën. Fürth huet an Ënnerzuel an no Réckstand de Match géint Düsseldorf nach mat 3:2 gewonnen an esou Kiel iwwerholl, déi hirersäits mat 2:3 géint Darmstadt verluer hunn. Kiel muss an der Relegatioun géint den 1. FC. Köln spillen, déi sech um Samschdeg a leschter Minutt géint Schalke konnte mat 1:0 duerchsetzen. D’Matcher an der Relegatioun ginn e Mëttwoch an e Samschdeg gespillt.
Karlsruhe mam Lëtzebuerger Dirk Carlson kënnt no 34. Spilldeeg ob déi 6. Plaz.
De Wee an déi 3. Liga musse Würzburg a Braunschweig untrieden. Osnabrück muss an d’Relegatioun géint Ingolstadt.
An der Premier League huet sech de Champion Manchester City och um leschte Spilldag souverän mat 5:0 géint Everton duerchgesat. Spannend war et um 38. Spilldag wéi eng Ekippe sech fir d’Champions League kënne qualifizéieren. Liverpool huet sech un der Anfield Road mat 2:0 géint Crystal Palace duerchgesat a kënnt um Enn op déi 3. Plaz an der Tabell.
Spannend war et tëscht Leicester an Chelsea. Laang huet et dono ausgesinn, dass Chelsea Plaz 4 verpasst, dat well Leicester géint Tottenham a Féierung louch. No engem Feeler vum Schmeichel an engem Gol vum Bale huet Tottenham de Match awer gedréint (4:2), sou dass d’Chelsea sech trotz enger Néierlag géint Aston Villa (1:2) ka fir d’Kinneksklass qualifizéieren. Leicester gëtt 5. an Tottenham 7. Arsenal spillt d’nächst Saison net international.
De Gang an déi 2. Liga musse Fulham, West Bromwich a Sheffield United untrieden. Dorun huet och de leschte Spilldag näischt méi geännert.
LINK: Den Iwwerbléck vun der Premier League
Nodeems Inter Mailand sech fréizäiteg de Meeschtertitel an Italien séchere konnt, ass et e Sonndeg den Owend um leschte Spilldag nach ëm d’Champions-League-Qualifikatioun gaangen. Den AC Mailand ka sech am direkten Duell géint Atalanta Bergamo mat 2:0 duerchsetzen a steet um Enn op der 2. Plaz an der Tabell. Als 3. klasséiert sech Atalanta. Déi leschte Plaz fir d’Kinneksklass ass fir Juventus Turin, déi domat mat der 4:1-Victoire géint Bologna nach laanscht Neapel gezu sinn. Neapel steet deemno no 38. Spilldeeg ob der 5. Plaz a muss de Gang an d’Europa League untrieden.
LINK: Den Iwwerbléck vun der Serie A
An der Ligue 1 ass et um Sonndeg den Owend zum Showdown tëscht Lille an dem PSG komm. Obwuel de PSG mat 2:0 zu Brest gewonnen huet ass et net méi duer gaangen, nach ob déi 1. Plaz ze kommen, dat well Lille säi Match och konnt erfollegräich zu Enn bréngen. Eng 2:1-Victoire géint Angers séchert dem OSC de Meeschter-Titel a Frankräich. Monaco muss an d’Champions League Qualifikatioun.
Metz spillt 1:1 gläich géint Marseille.
LINK: Den Iwwerbléck vun der Ligue 1
LINK: Den Iwwerbléck vun der Bundesliga
LINK: Den Iwwerbléck vun der La Liga
Den Iwwerbléck vun der Bundesliga
