RTL - Olympesch Spiller: Charel Grethen gëtt den 12. iwwer 1500 Meter

An der Finall vun der 1500m-Course wënnt den Norweger Ingebrigtsen an enger Zäit vun 3:28.32.

De Charel Grethen huet sech e Samschdeg bei den Olympesche Spiller an der Finall iwwer 1500 Meter als 12. klasséiert. An enger ganz séierer Course gouf de Lëtzebuerger séier no hannen duerchgereecht. Um Enn ass de Chrono no 3 Minutte 36 Sekonnen an 80 Honnertstel stoe bliwwen. Fir de Charel Grethen ass et de bis ewell gréissten Erfolleg a senger Karriär an et war een historeschen Ament fir de Lëtzebuerger Sport.
De Charel Grethen huet bei dësen Olympesche Spiller méi wéi iwwerzeegt. Souwuel a senger Serie, wéi och an der Hallefinial wou hie säi Lëtzebuerger Rekord ëm ronn 4 Sekonne verbessert huet. Déi zwou Courssen huet hien awer an der Finall gespuert, och wann hie sech gutt gespuert huet.

Charel Grethen: "Ech hat näischt ze verléieren"

D'Goldmedail huet sech den 20 Joer alen Norweger a Favorit Jakob Ingebrigtsen geséchert. Mat 3 Minutten, 28 Sekonnen an 32 Honnertstel ass hien een neien Olympesche Rekord gelaf.

Charel Grethen: "Et war eng immens séier Course"

Um Podium stinn nach de Kenianer Timothy Cheruiyot an de Britt Josh Kerr.

De Charel Grethen hat en Donneschdeg den Exploit fäerdeg bruecht, fir sech fir d'Finall iwwer 1500 Meter bei den Olympesche Spiller ze qualifizéieren. De Lëtzebuerger hat den nationale Rekord ëm bal 4 Sekonnen op 3 Minutten, 32 Sekonnen a 86 Honnertstel verbessert.

Dem Charel Grethen seng nächste Course ass Enn August zu Schëffleng. E krut och schonn eng Invitatioun fir Diamond League zu Bréissel, Ufank September.

Et war zanter 1952 nees déi éischte Kéier, datt ee Lëtzebuerger Sportler et an d’Finall vun enger Liichtathletik-Competitioun op olympesche Spiller gepackt huet. Bei dëse Spiller huet de Charel Grethen dat absolut beschte Lëtzebuerger Resultat realiséiert.

PDF: Schreiwes vum COSL

D’Lëtzebuerger Sportler op den Olympesche Spiller

Les photos diffusées sur ce site sont soumises à des droits d’auteurs et ne peuvent être copiées, modifiées, vendues, sans l’autorisation préalable du propriétaire du site en question.

Um Glacis war e Samschdeg och e Public Viewing. Hei konnten d'Supporter vum CSL-Athlet d'Course live suivéieren. Eng 300 Veräinsmemberen, Frënn an Intresséierter waren hei zesummekomm. Organiséiert gouf dat ganzt vum Charel Grethen sengem Liichtathletik-Klub CSL, zesummen mat der Stad Lëtzebuerg.

Les photos diffusées sur ce site sont soumises à des droits d’auteurs et ne peuvent être copiées, modifiées, vendues, sans l’autorisation préalable du propriétaire du site en question.

Eng Enttäuschung, datt de prominente Veräinsmember keng Medail gewonnen huet, gouf et net. Wuel am meeschte geféiwert hat dem Charel Grethen säi fréieren Trainer Alja Miracic, deen hien laang Zäit begleet hat. Säi Bols ass wärend der Course méi séier geschloen. Hien ass mat der Leeschtung vum 1500-Meter-Leefer zefridden.

Den Alja Miracic gleeft net, datt et de leschten Olympia-Optrëtt vum Charel Grethen war. Schonn an 3 Joer stinn d’Olympesch Spiller zu Paräis un. Do wäert den CSL- Athleet nees ugräifen, fir sech säin Dram fir eng Medail, dach nach ze erfëllen.