Atlético verléiert iwwerdeems géint Alavés an Inter Mailand a Liverpool spille gläich.

An der Bundesliga ass e Samschdeg och de Ball gerullt. Klickt hei, fir op d'Resultater ze kommen.

Premier League

Chelsea - Manchester City 0:1
0:1 G.Jesus (53')

Den englesche Champion Manchester City wënnt auswäerts beim Champions-League-Gewënner Chelsea mat 1:0. De Gol vum Dag huet de Gabriel Jesus an der 53. Minutt geschoss. De Match war virun allem taktesch geféiert. Nom Gol vum Gabriel Jesus ass et dunn méi hin an hier gaangen. Um Enn setzt sech d'Ekipp vum Pep Guardiola allerdéngs verdéngt duerch.

Manchester United - Aston Villa 0:1
0:1 Hause (88')

Aston Villa klappt Manchester United auswäerts mat 1:0. An der 88. Minutt huet de Kortney Hause d'Villans mat 1:0 Féierung bruecht. Op der Säit vum englesche Rekordchampion huet de Bruno Fernandes an der Nospillzäit een Eelefmeter verschoss.

Brentford - Liverpool 3:3
1:0 Pinnock, 1:1 Jota (31'), 1:2 Salah (54'), 2:2 Janelt (63'), 2:3 Jones (67'), 3:3 Wissa (82')

Liverpool ass beim Opsteiger Brentford net iwwert een 3:3-Remis erauskomm, ma dësem Resultat dierft d'Ekipp vum Klopp net zefridde sinn. D'Lokalekipp louch zweemol hannen, ma konnt sech um Enn awer ee Punkt kropen. De Salah huet iwwerdeems mam tëschenzäitlechen 2:1 säin 100. Gol fir d'Reds markéiert. Duerch d'Néierlage vun Chelsea a ManUnited steet Liverpool elo eleng un der Spëtzt vun der Tabell.

Serie A

Spezia Calcio - AC Mailand 1:2
0:1 Maldini (48'); 1:1 Verde (80'); 1:2 Diaz (87')

Den AC Mailand setzt sech mat 2:1 bei Spezia Calcio duerch. De Vizechampion aus dem leschte Joer huet sech géint d'Ekipp vum fréiere Barcelona- a PSG-Spiller Thiago Motta schwéier gedinn. Den Daniel Maldini, Bouf vum Paolo Maldini, hat den AC kuerz no der Paus mat 1:0 a Féierung bruecht. Den Daniele Verde konnt dëse Score an der 80. Minutt egaliséieren. 7 Minutten duerno huet de Brahim Diaz mat sengem Gol fir d'Schlussresultat gesuergt. Mat dësem Succès ass den AC Mailand weider ongeschloen a spréngt provisoresch mat 16 Punkten op Plaz 1.

Inter Mailand - Atalanta Bergamo 2:2
1:0 Martinez (5'), 1:1 Malinovsky (30'), 1:2 Toloi (38'), 2:2 Dzeko (71')

Inter Mailand muss sech mat engem 2:2 géint Bergamo zefridde ginn. Inter war an der 5. Minutt schonn duerch de Martinez a Féierung gaangen. Duerno konnten d'Gäscht de Match allerdéngs dréinen. No Goler vu Malinovsky an Toloi ass ee mat engem 2:1-Avantage an d'Paus gaangen. Nom Téi huet den Dzeko et fäerdeg bruecht, fir an der 71. Minutt den 2:2 fir Inter ze schéissen. Kuerz viru Schluss hat Mailand nach d'Chance, fir duerch een Eelefmeter den decisive Gol ze schéissen, ma den Dimarco konnt net verwandelen. Et ass deemno beim 2:2 bliwwen.

Ligue 1

Saint-Étienne - Nice 0:3
0:1 Gouiri (15'), 0:2 Stengs (54'), Delort (83')

Stroossbuerg - Lille 1:2
0:1 David (23'), 0:2 David (57', Eelefmeter), 1:2 Sissoko (75')

Lyon - Lorient 1:1
0:1 Lauriente (20'), 1:1 Ekambi (50')

PSG - Montpellier 2:0
1:0 Gueye (14'), 2:0 Draxler (88')

De PSG huet och säin aachte Championnatsmatch noenee gewonnen. Géint Montpellier hunn awer net d'Stare wéi Neymar, Mbappé oder di Maria d'Goler geschoss, ma et war de Gueye an der 14. Minutt, deen déi Paräisser a Féierung bruecht huet. An der 88. Minutt huet den Draxler mam 2:0 fir d'Schlussresultat gesuergt.

La Liga

Deportivo Alavés - Atlético Madrid 1:0
1:0 Languardia (4')

De spuenesche Champion Atlético Madrid verléiert beim Ofstigskandidat Deportivo Alavés duerch ee Gol vum Victor Languardia mat 0:1. Atlético ass de ganze Match zu kenge richtege Chancë komm a kasséiert domat déi éischt Defaite an dëser Saison.

Real Madrid - Villarreal 0:0

Real Madrid huet fir d'zweete Kéier an dëser Saison d'Punkte gedeelt. Géint deen och nach ongeschloenen FC Villarreal ass de Blancos ze wéineg agefall an esou geet den 0:0 no 90 Minutten an d'Rei.