An der franséischer Ligue 1 gouf et e Sonndeg iwwerdeems eng 2:1-Victoire fir Troyes mam Gerson Rodrigues.

Sonndeg

An der MLS gouf et fir de Maxime Chanot an der Eastern Conference um Sonndeg eng héich Victoire ze feieren. Bei der 6:0-Victoire vun New York City géint den D.C. United  war de Lëtzebuerger Defenseur de ganze Match am Asaz an huet dobäi hannen näischt duerchgelooss.

ESTAC Troyes huet sech am Match géint Stade Reims dräi wichteg Punkte geséchert. Um Enn konnte si sech mat 2:1 duerchsetzen. Den Gerson Rodrigues war beim Stand vun 1:1 agewiesselt ginn an huet de Match mat senger Ekipp nach gedréint krut.

De Vahid Selimovic hat a Griechenland beim OFI Kreta e kuerzen Asaz. Hie gouf beim 0:0 géint den FC Lamia an der 85. Minutt agewiesselt a konnt de Match ouni Géigegol iwwert d'Zäit bréngen.

Samschdeg

An der Belsch suergt Royale Union St. Gilloise weider fir staark Resultater. Den Opsteiger huet sech mat 3:2 zu Eupen duerchgesat. De Lëtzebuerger Nationalgolkipp Anthony Moris stoung wéi gewinnt tëscht de Pottoe bei de Gäscht. Wären der Partie gouf et allerdéngs Zeenen, déi ee beim Futtball net wëll gesinn. Supporter vun Eupen hunn nämlech Saachen op den Terrain gehäit an den Anthony Moris gouf vun engem Géigestand um Kapp getraff. Den Arbitter huet d'Partie kuerz ënnerbrach an eréischt no 10 Minutten nees ugepaff. De Moris konnt weiderspillen.

St. Gilloise huet duerch dës Victoire weider eng Avance vun 3 Punkten op den Tabellenzweete Bruges. D'Resultater vum belsche Championnat fannt Dir hei.

Am hollännesche Championnat huet Sparta Rotterdam mam Laurent Jans a Mica Pinto auswäerts mat 0:1 géint Waalwijk verluer. Béid Lëtzebuerger stounge fir d'éischte Kéier zesummen an der Startformatioun an hunn de Match duerchgespillt. Rotterdam steet weider op enger Ofstigsplaz.

Iwwert eng weider Victoire konnte sech d'Young Boys Bern freeën. Mat engem 3:2 géint Lausanne-Sport huet ee sech déi dräi Punkte geséchert. Bern steet domadder weider mat engem Punkt Retard op Basel op der zweeter Plaz an der Tabell. De Christopher Martins huet bei de Young Boys Bern net gespillt.

An der 2. Liga an England hat Huddersfield Town keng Chance beim Leader Bournemouth. Danel Sinani a Co hu sech kloer mat 0:3 misse geschloe ginn. De Lëtzebuerger gouf an der 56. Minutt agewiesselt.

An der Ukrain war et een Dag fir ze vergiesse fir den Olivier Thill. Bei der 0:2-Néierlag vu senger Ekipp Worskla Poltawa géint Schachtar Donezk huet den Thill an der 29. Minutt Giel-Rout gesinn. Am ukrainesche Championnat huet dann nach Lviv géint den direkte Konkurrent ëm den Ofstig Odessa 1:1 gespillt. Lviv steet aktuell op enger Relegatiounsplaz. Den Enes Mahmutovic huet bei Lviv wéinst enger Blessur gefeelt.

Am moldawesche Championnat huet Sheriff Tiraspol mam Sébastien Thill 2:0 géint Balti gewonnen. De Lëtzebuerger Nationalspiller stoung déi 90 Minutten iwwer um Terrain.

An der 3. Liga an Däitschland huet Saarbrécken géint 1860 München 1:1 gläichgespillt. D'Lokalekipp léisst domadder zwee Punkte leien an huet no 13 Spilldeeg e Retard vu 7 Punkten op de Leader Magdeburg. De Maurice Deville stoung aus gesondheetleche Grënn net am Kader vu Saarbrécken.

Op Zypern huet Achnas fir de Kont vum 7. Spilldag am Championnat 2:2 géint AEL Limassol gläichgespillt. Den Tim Hall stoung bei Achnas de ganze Match um Terrain an huet an der 17. Minutt Giel gesinn. Mat nëmmen zwee Punkte steet Achnas op der leschter Plaz an der Tabell.

An Éisträich huet Austria Wien den SV Ried mat 4:0 geklappt. De Marvin Martins feelt bei Wien weider wéinst enger Blessur.

Freideg

An der 2. däitscher Bundesliga ass et fir Erzgebirge Aue e Freideg den Owend déi éischt Victoire vun der Saison ginn. Beim 1:0-Succès géint Ingolstadt ass den Dirk Carlson allerdéngs net zum Asaz komm.

Fir den UD Vilafranquense an den Eric Veiga gouf et iwwerdeems an der zweeter portugisescher Liga eng 1:3-Defaite géint Leixões. De Lëtzebuerger Nationalspiller stoung dobäi vun Ufank un um Terrain, mat senger Ekipp konnt den 0:1-Réckstand aus der éischter Hallschent awer net méi gedréint ginn.

Iwwerdeems gouf et an der 1. Bundesliga fir de Leandro Barreiro mam 1. FSV Mainz eng kloer 4:1-Victoire géint den FC Augsburg.