Déi Bierchemer hunn de Retourmatch wuel mat 31:30 gewonnen, ma dat ass net duergaangen, fir déi kloer 22:33-Defaite aus dem Allersmatch guttzemaachen.

Bierchem huet am 2. Tour vum EHF European Cup eng Iwwerraschung géint Partizan Belgrad verpasst. De Lëtzebuerger Coupegewënner konnt sech e Samschdeg am Retourmatch wuel iwwer eng 31:30-Victoire freeën, ma dat ass net duergaangen, fir déi kloer 22:33-Néierlag aus dem Allersmatch nees guttzemaachen. Domadder ass Bierchem eliminéiert.

Nodeems een an der Paus mat 13:16 hanne louch, ass et bis zum Schluss a puncto Resultat spannend bliwwen. De Veräin aus dem Grand-Duché konnt de Réckstand kleng halen, e puer Mol ausgläichen an an de leschte Minutten d'Féierung ëmmer nees iwwerhuelen. Um Enn sollt de Kampf ëm d'Victoire am Retourmatch dann och belount ginn. Duerch e Gol vum Yann Hoffmann Sekonne viru Schluss huet ee sech mat 31:30 duerchgesat. De Yann Hoffmann war mat sengen 8 Goler dann och de beschte Scorer op Säite vu Bierchem.

Mat Käerjeng war e Samschdeg nach een zweete Lëtzebuerger Veräin am 2. Tour vum EHF European Cup gefuerdert. Käerjeng huet den Allersmatch géint Focsani aus Rumänien mat 27:35 verluer. An der Paus louchen déi Käerjenger mat 14:18 hannen. An der zweeter Hallschent huet Käerjeng et fäerdeg bruecht, fir de Réckstand op Focsani ze verkierzen a konnt an der 49. Minutt op 25:25 ausgläichen. Nodeems et 9 Minutt viru Schluss nach 26:26 stoung, hu Radojevic a Co de Géigner awer missen dovunner zéie loossen an esou huet een um Enn dach nach kloer op 8 Goler verluer. De Sebastian Edgar war bei Käerjeng mat 8 Goler de beschte Scorer.