Am zweete Match aus der Best-of-Five-Serie konnt d'Amicale eng Äntwert op d'Defaite aus der éischter Finall weisen a sech mat 89:82 duerchsetzen.

Steesel kann ausgläichen - Reportage vum Rich Simon

E Mëttwoch den Owend huet sech an der 2. Finall vum LBBL Championnat bei den Hären d'Amicale Steesel mat 89:82 (31:22, 21:15, 17:23, 20:22) géint Diddeleng duerchgesat. An der éischter Finall vun der Best-of-Five-Serie gouf et e Samschdeg eng 83:73-Victoire fir den T71.

No der Defaite aus dem éischte Match huet d'Amicale zu Diddeleng eng staark Reaktioun gewisen a mat 31 Punkte bannent den éischten zéng Minutten en immens gudde Start erwëscht. Fir den T71 war et also mat engem Réckstand vun néng Punkten an den zweete Véierel gaangen, wou d'Ekipp vu Steesel awer gutt weider gemaach huet an domat eng 52:37-Féierung an der Hallschent stoung.
Jonas Theisen: "Zum Schluss, war et awer nach eng Kéier enk ginn. Bei enger Ekipp wéi Diddeleng, déi vill Shooter huet, do muss ee sech erwaarden, datt déi ee Run maachen.  Mir hu gutt drop geäntwert a virun allem am Rebound gutt geschafft. Dee Virsprong dee mir haten, hu mir iwwer de ganze Match gehalen. Ech mengen, datt si net eng Kéier vir komm sinn."

Am drëtte Véierel huet et Diddeleng dann nach ee Mol spannend gemaach a war bis zum Enn vun der Partie um gudde Wee de Réckstand opzehuelen. Trotz enger gudder Moral sollt et awer net méi duergoen de Match ze dréinen a sou wënnt Steesel de Match mat 89:82.

Duerch d'Victoire vun der Amicale Steesel steet domat och fest, datt fir eng Decisioun op d'mannst zwee weider Matcher gespillt musse ginn. Di Diddelenger sinn déi leschte Woche ganz souverän opgetrueden. E Mëttwoch war dat beim Tom Schumacher senger Ekipp awer net ganz de Fall.

Tom Schumacher: D'Intensitéit war net do. Firwat ass schwéier ze erklären. Et ass eng Finall a mir hunn eng grouss Chance, fir den 2-0 ze maachen Richtung Championstitel. Villäicht hu mir et op déi liicht Schëller geholl. Ech hat awer déi ganz Woch iwwer net d'Impressioun, datt mir dat gemaach hunn. Mir hate vill Up's and Down's. Et ass eng Serie. Steesel ass verdéngt an der Final a si hu verdéngt haut gewonnen. Et war relativ kloer vun Ufank un, datt dat heiten keng 3-0 Serie gëtt.

Fir den Nationaltrainer Ken Diederich, geet d'Victoire vu Steesel komplett an d'Rei.

Ken Diederich: Diddeleng huet de Match an der éischter Hallschent komplett verschlof. Ech denken, datt si do net gutt gespillt hunn. Si hunn d'Energie net bruecht déi ee brauch, fir esou eng Finall ze spillen. Steesel huet eng gutt Reaktioun gewisen an e puer Ajustementer gemaach an haut dowéinst verdéngt gewonnen. Den drëtte Match gëtt elo schonns e Sonndeg um 20.15 Auer zu Steesel gespillt an net wéi geplangt war e Méindeg.