Fir den Optakt vum 14. Spilldag an der BGL Ligue spille Monnerech a Käerjeng 1:1 iwwerdeems de Racing mat 1:0 op Ettelbréck gewanne geet. 

De Résumé vum Futball - Reportage Serge Olmo

Stinn op der Weltmeeschterschaft am Katar déi éischt Aachtelsfinallen um Programm, war et am nationale Futtball-Championnat um Samschdeg den Optakt vum 14. Spilldag an der BGL Ligue. D’Etzella Ettelbréck huet doheem géint de Racing gespillt a Monnerech huet um 18 Auer Besuch vu Käerjeng gehat.

De Racing ass senger Favoritteroll an den Däichwisen dann och gerecht ginn a gewënnt mat 1:0. De Gol vum Dag huet de Simon an der 33. Minutt markéiert. Alles an allem eng verdéngte Victoire fir de Stater Racing, hätte si an der Paus mat deem engem oder anere Gol méi héisch a Féierung kéinte leien. Ettelbréck huet iwwert de ganze Match offensiv kaum stattfonnt an huet sech d'Liewen no enger Giel-Rouder Kaart vum Kramaric an der 70. Minutt selwer schwéier gemaach. De Racing leit elo provisoresch op der 3. Plaz an der Tabell, iwwerdeems d'Etzella weider am Tabellekeller steet.

Duell vun den Opsteiger geet no 90 Minutte mat engem 1:1-Remis op en Enn. No enger monterer Ufanksphase mat Chancen op béide Säiten huet Käerjeng sech an der 12. Minutt a Persoun vum Leroux mat engem flotten Distanzschoss konnte belounen. Nom Säitewiessel huet Monnerech sech net hänke gelooss a hu mat hire Mëttele versicht nees zeréck an de Match ze kommen. Déi Giel-Rout-Kaart vum de Sousa an der 69. Minutt huet d'Saach awer net méi einfach gemaach. Laang huet et no enger Victoire fir d'Gäscht ausgesinn, éier d'Lokalekipp an der 90. Minutt dach nach den Ausgläich duerch de Mokrani markéiere konnt.

D'Resultater am Iwwerbléck (Replay an Ticker)

D'Tabell