An Holland spillt Sparta Rotterdam mam Lëtzebuerger Mica Pinto 0:0 géint Waalwijk.

Fir de Mathias Olesen war et wuel e klengen Highlight, um 17. Spilldag vun der Bundesliga stoung hien nämlech en Dënschdeg géint Bayern München an der Startopstellung.

Méindeg

An der 3. däitscher Liga war et um Méindeg d'Partie fir den 19. Spilldag tëscht Duisburg a Mannheim. Um Enn sollt de Laurent Jans mat senger Ekipp vu Waldhof Mannheim 3:1 gewannen. De Lëtzebuerger huet iwwerdeems den 2:1 virbereet. Hie stoung de ganze Match um Terrain.

Sonndeg

An der Tierkei gouf et fir den Tabelleleader vun der 2. Liga Eyüpspor  eng batter Defaite géint den Tabellenzweeten Samsunspor. Den Olivier Thill ass op Säite vun Eyüpspor an der 65. Minutt beim Stand vun 1:1 agewiesselt ginn. Just kuerz drop ass dunn den 1:2 gefall, éier et an de leschte Minutten däitlech ginn ass.

An der zweeter hollännescher Liga kënnt ADO Den Haag doheem géint den Tabelleleschten aus Utrecht net iwwert een 1:1 eraus. Den Dirk Carlson huet bei Den Haag 90 Minutten op der Bänk Plaz geholl.

An der Bundesliga huet Borussia Mönchengladbach sech missen 2:3 géint Leverkusen geschloe ginn. De jonken Yvandro Borges stoung opgrond vun enger Verletzung net am Kader vun de Borussen.

Samschdeg

Fir de Kont vum 14. Spilldag a Saudi-Arabien huet sech Al Wehda mam Gerson Rodrigues 1:0 géint Al Taee duerchgesat. De Lëtzebuerger Nationalspiller huet de Match mat sengem Gol an der 65. Minutt entscheet. Ausserdeem stoung hie 90 Minutten um Terrain. Duerch déi dräi Punkten huet Al Wehda d'Ofstigsplaze verlooss. Mat engem Match manner huet d'Ekipp vum Rodrigues elo 2 Punkten Avance op eng direkt Ofstigsplaz.

An der 2. englescher Liga gouf et eng 4:2-Victoire fir Norwich zu Coventry. No 18 Minutte louch Norwich scho mat 3:0 a Féierung. An der 26. Minutt war d'Heemekipp awer op 2:3 erukomm. Nom véierte Gol vum Dowell an der 65. Minutt war de Succès net méi a Gefor. Den Danel Sinani souz 90 Minutten op der Bänk.

Den Eric Veiga a Vilafranquense hu sech auswäerts kloer mat 3:0 zu Belenenses beim B-SAD duerchgesat. Den Ofwierspiller krut an der 62. Minutt déi giel Kaart gewisen. An der Tabell läit Vilafranquense den Ament op der 3. Plaz.

En 1:1-Remis gouf et an der Bundesliga tëschent Stuttgart a Mainz. Op Säite vun de Gäscht stoung de Leandro Barreiro vun Ufank un um Terrain an huet den Eelefmeter, deen den Ausgläich fir seng Ekipp bruecht huet, erausgeholl. An der 79. Minutt krut hien déi giel Kaart gewisen. 8 Minutte méi spéit ass de Mëttelfeldspiller ausgewiesselt ginn.

Am Topmatch um Samschdeg Owend huet Köln mam Mathias Olesen Werder Bremen 7:1 iwwerrannt. De Lëtzebuerger gouf an der 59. Minutt agewiesselt an huet de 7. Gol vu senger Ekipp um Terrain materlieft.

Fir de Florian Bohnert ass et an der Coupe de France mat Bastia net gutt gelaf. D'Ekipp aus der Ligue 2 huet an der 1/16-Finall géint Lorient aus der Ligue 1 no Eelefmeterschéisse verluer. De Bohnert ass an der 76. Minutt agewiesselt ginn a krut 5 Minutte méi spéit déi giel Kaart gewisen. En Eelefmeter huet de Nationalspiller net geschoss.

An Holland gouf et eng 3:0-Victoire fir Sparta Rotterdam zu Cambuur-Leeuwarden. De Mica Pinto stoung dobäi de ganze Match um Terrain.

D'Union Saint-Gilloise huet um 22. Spilldag an der Belsch mat 1:0 géint Oud-Heverlee Leuven gewonnen. Den Anthony Moris stoung wéi gewinnt de ganze Match tëschent de Pottoen.