Bei den Häre gëtt et eng duebel Victoire fir Däitschland. Am Schi Alpin ass et déi 1. Plaz fir d'Mikaele Shiffrin.

Biathlon

Iwwer 15 Kilometer ka sech zu Östersund a Schweden bei den Dammen d'Lisa Vittozzi trotz engem Schéissfeeler d'Victoire sécheren. D'Italienerin hat op der Arrivée awer nëmmen e ganz knappe Virsprong (+0.10 Sekonnen) géigeniwwer dem Franziska Preuß aus Däitschland, dat um Schéissstand feelerfräi geschoss huet. Déi drëtte Plaz um Podium ass fir d'Vanessa Voigt.

Bei den Hären ass et bei der 20-Kilometer-Eenzelcourse eng iwwerraschend Victoire fir de Roman Rees ginn. Fir den Däitschen ass et déi éischte Victoire a senger Karriär. Mat 1 Schéissfeeler huet hien um Schéissstand Basis fir seng 1. Plaz geluecht. Op d'Plazen 2 an 3 fueren de Justus Strelow an de Johannes Thingnes Bö.

Schisprangen
De Stefan Kraft ass no senger Victoire e Samschdeg och e Sonndeg an enger anerer Liga geflunn a gewënnt domat säin 2. Sprangen an dëser nach jonker Saison. Den Éisträicher gewënnt viru sengem Landsmann Jan Hörl an dem Däitschen Andreas Wellinger. De Stefan Kraft hat no 2 Duerchgäng en impressionnante Virsprong vu ronn 23 Punkten.

Schi Alpin

Beim Schi Alpin louch nom 1. Slalom-Duerchgang d'Mikaele Shiffrin beim Weltcup zu Killington an den USA virum Lena Dürr an dem Petra Vlhová a Féierung.

An et sollt dann och d'Amerikanerin sinn dat och am 2. Duerchgang dat séierst war. Mikaela Shiffrin gewënnt virum Petra Vlhová an der Schwäizerin Wendy Holdener. D'Lena Dürr verpasst de Podium knapp a klasséiert sech op der 4. Plaz.